भांगरभूंय | प्रतिनिधी
म्हापशेंः गणेशपुरी- म्हापशेंच्या डॉ. महेंद्र घाणेकार हांच्या बंगल्यांत सशस्त्र दरोडो घालून फरारी जाल्ली टोळी बांगलादेशी आशिल्ल्याचें स्पश्ट जालां. मेघालय पुलिसांची नदर चुकोवन ही टोळी भारतीय शिम हुपून बांगलादेशांत पळून गेली.
गोंय, कर्नाटक, हैदराबाद, अस्तंत बंगाल ते मेघालय ह्या पांच मुखेल राज्यांच्यो शिमा हुपून पुलीस एजन्सींची नदर चुकोवन ही टोळी बांगलादेशांत पावली. आतां हे टोळयेक भारतांत हाडून ही दरोडो केस सोडोवप हे गोंय पुलिसां मुखार व्हडलें आव्हान आसा. मजगतीं, गुन्यांव फांट्याचे कांय पुलीस पंगड सध्या अस्तंत बंगाल आनी मेघालय राज्यांत दरोडेखोरांची म्हायती मेळोवपाक थंयच आसात.
7 ऑक्टोबराक डॉ. घाणेकार हांच्या बंगल्याचेर दरोडो पडलो. पयशे, भांगर, आनी मोलादीक वस्तू मेळून वट्ट 35 लाख रुपयांचो म्हाल घेवन दरोडेखोर पळून गेले. तांचो सोद घेवपा खातीर गोंय पुलिसांनी पंगड तयार करुन शेजारच्या रांज्यांनी धाडिल्ले. पूण तांचो सोद घेवप शक्य जालें ना. दरोडेखोरांनी पुलिसांची नदर चुकोवन देशाची शीम हुपल्या देखून सध्या तरी तांकां धरप कठीण.
मजगतीं, चवकशे वेळार गोंय पुलीस पंगडांनी पांच जाणांक ताब्यांत घेतिल्ले. तांणी दरोडेखोरांक मजत केल्ली. ह्याच दुबावितांनी दरोडेखोरांक पळून वचपा खातीर गरजेची वेवस्था केल्ली. तांची पुलीस पुराय चवकशी करतात. बांगलादेशांत पळून गेल्ली दुबावीत टोळी खंयच्या सुवातेर आसा हाची ठोस म्हायती मेळूंक ना अशें पुलीस सुत्रां कडल्यान कळटा.
दरोडो प्रकरणाची म्हायती पुलिसांक मेळचे आदींच गोंयची शिम हुपून दरोडेखोर कर्नाटकांत पाविल्ले. गोंय, कर्नाटक, हैदराबाद, अस्तंत बंगाल आनी मेघालय ह्या पांच राज्यांच्यो शिमो हुंपून ही टोळी बांगलादेशांत पावली. आतां ह्या टोळयेक भारतांत हाडून ही दरोडो केस सोडोवप हे गोंय पुलिसां मुखार व्हडलें आव्हान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
