भांगरभूंय | प्रतिनिधी
म्हापशें: बार्देस म्हालांतल्या शेतकारां मदीं काजी लागवडी संबंदांत उर्बा मेळची, हे खातीर म्हापशें विभागीय कृशी कार्यालयाच्या मार्गदर्शना खाला अंदूं सुमार 20 हॅक्टर जमनींत काजू लागवड केल्या.
हे आदीं ह्या म्हालांतली सुमार 5 ते 6 हॅक्टर जमीन काजी लागवडी खाला आशिल्ली, पूण अंदूं ह्या म्हालांतल्या गांवगिऱ्या वाठारांत कृशी खात्याच्या यत्नांक लागून काजी बागायतींत व्हड भर पडल्या. म्हालांत आतां सुमार 14 हॅक्टर जमनीची भर पडिल्ल्यान हो वाठार आतां 20 हॅक्टर जाला.
पीर्ण, नादोडें, रेवोडें, सिरसय आनी कामुर्ली ह्या गांवांनी हे लागवडींत भर पडल्या. विभागीय कृशी कार्यालयाच्या यत्नां सयत हे वाडटे लागवडीचें आनीक एक म्हत्वाचें कारण म्हणल्यार राज्य सरकाराची 75 टक्के अनुदान येवजण. हे यवजणेचो लाव कृशी कार्ड आशिल्ले आनी नाशिल्ले शेतकारूय घेवपाक शकतात.
विभागीय कृशी कार्यालयाच्या खर यत्नां वांगडाच गोंय कृशी बाजारानूय काजी लागवडींत वाड जावची हे खातीर मेहनत घेतल्या. हाका लागून बार्देस आनी दिवचल म्हालांत सुमार तीन हजार काजू कलमांची विक्री बाजारा वतीन करपाक येस आयलां.
म्हापशें विभागीय सहाय्यक कृशी अधिकारी पल्लवी शेट्ये हांणी सांगलें, आमी शेतकारांची बसका घेवन तांकां काजू लागवड करपाक मुखार काडले. ह्या प्रयोगांत आमकां बरो प्रतिसाद मेळटा. अजून लेगीत अदीक जमीन लागवडी येवपाची आस्त आसा. विभागीय कृशी अधिकारी संपत्ती धारगळकार हांणी सांगलें, म्हालांतल्या शेतकारांनी व्हड प्रमाणांत काजूची लागवड केली. अंदूं सुमार 20 हॅक्टर जमीन लागवडीखाला आयल्या. आनीक जमीन लागवडी खाला हाडपाचो आमचो यत्न आसा. शेतकारांनी फुडें सरून सरकारी येवजण्यांचो लाव घेवचो.
शेतकारांक विस्वासांत घेतलेः मीना केसरकार
सरकारी येवजण्यां विशीं जनजागृती करचे खातीर आमी पिर्णा शेतकारांची बसका घेतली. अशा येवजण्यांची म्हायती शेतकारांक नाशिल्ली. शेतकारांक आमी विस्वासांत घेतले आनी शेतकार हे येवजणेचो लाव घेवपा खातीर फुडें सरले. आमी बार्देस आनी दिवचलच्या शेतकारांक 15 रुपया ह्या दरान 3 हजार काजू कलमांची विक्री केली. ह्या कलमांचें प्रत्यक्ष मोल 60 रुपया आसा. राज्य सरकारा वतीन 45 रुपया अनुदान मेळटा, अशें गोंय कृशी बाजाराची म्हावेवस्थापक मीना केसरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
