ईपीएफ खात्यांतल्यान पुराय रक्कम काडपाक मेळटली
भांगरभूंय | प्रतिनिधी
नवी दिल्ली, खबरां संस्था ः आतां ईपीएफ खात्यांतल्यान पुराय रक्कम काडपाची मेकळीक मेळटली. कर्मचारी भविष्य निधी संघटणेन (ईपीएफओ) सोमारा, 13 ऑक्टोबराक केंद्रीय विश्वस्त मंडळाचे (सीबीटी) बसकेंत ही घोशणा केली.
केंद्रीय कामगार मंत्री मनसुख मांडवीय हांच्या अध्यक्षते खाला जाल्ले बसकेंत कितलेशेच थाकाय दिवपी निर्णय घेतले. ह्या निर्णयांक लागून नोकरी करपी व्यक्तींक आपलो ईपीएफ निधी काडप पयलीं परस आतां सोंपें जातलें.
ईपीएफओच्या बसकेंत घेतिल्ले म्हत्वाचे निर्णय…
- आतां 100% पयशे काडपाची सुविधा
ईपीएफओन आदले 13 खर नेम रद्द केल्यात आनी आतां फकत तीन वर्गांत पयशे काडपाक परवानगी दिल्या. तातूंत आवश्यक गरजो (दुयेंत, शिक्षण, लग्न), घरगुती गरजो (घरगुती संबंदीत खर्च) आनी विशेश परिस्थिती. आतां वांगड्यांक तांच्या पीएफ खात्यांतली पुराय शिल्लक काडपाक मेळटली.
पयलीं शिक्षण आनी लग्न हांचे खातीर फकत तीन फावटींच पयशे काडपाक मेळटाले, पूण आतां शिक्षणा खातीर 10 आनी लग्ना खातीर पांच फावटीं पयशे काडपाक मेळटात. तशेंच उण्यांत उणो सेवा कालावधी 12 म्हयन्यां मेरेन उणो केला, जो पयलीं वेगवेगळ्या गरजां खातीर वेगवेगळो आशिल्लो.
- कारण नासतना पयशे काडप
पयलीं खाशेल्या परिस्थितींत (देखीक सैमीक आपत्ती, बेरोजगारी वा महामारी) हे खातीर पयशे काडपा खातीर स्पश्टीकरण दिवचें पडटालें, जाका लागून जायते वेळार दावे न्हयकारताले. आतां ही अडचण पयस जाल्या. वांगड्यांक कारण सांगिनासतना खाशेल्या परिस्थितींत पयशे काडपाक मेळटात.
- 25% उण्यांत उणी शिल्लक जाय
वांगड्यांनी आपल्या खात्यांत उण्यांत उणी 25% शिल्लक दवरची अशें ईपीएफओन म्हणलां. हाका लागून वांगड्यांक 8.25% व्याजदर आनी चक्रवाड व्याजाचो फायदो चालू उरतलो. जाका लागून तांकां व्हडलो निवृत्ती निधी तयार करपाक मेळटलो.
- सोंपी ऑटो सेटलमेंट प्रक्रिया
नव्या नेमा प्रमाण कसलेच कागदपत्र सादर करपाची गरज ना. पयशे काडपाची प्रक्रिया पुरायपणान स्वयंचलीत जातली, जाका लागून दावे निकालांत बेगीन येतलें. मुदती पयलीं निमाणो निवाडो काळ दोन म्हयन्यां वयल्यान 12 म्हयने आनी पेन्शन काडपाचो काळ दोन म्हयन्यां वयल्यान 36 म्हयने केलां. हाका लागून वांगड्यांक निवृत्ती निधीचो वापर करिनासतना तांच्या गरजे खातीर पयशे काडपाक मेळटलो.
हे बसकें वेळार कामगार मंत्री मांडविया हांणी जायत्या डिजिटल उपक्रमांचें उक्तावण केलें. जाका लागून ईपीएफओ सेवा चड पारदर्शक, बेगीन आनी वापरप्यांक सोंपी जातली. हे नवे ईपीएफओ नेम आनी येवजण्यो काम करपी व्यक्तींक तांच्या गरजे वेळार सहजतायेन पयशे काडपाक आनी त्याच वेळार निवृत्ती वेळार बचतीची राखण करपाक फायद्याचे थारतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
