पर्वरे येरादारीची कोंयडी

भांगरभूंय | प्रतिनिधी

रायबंदर, चोडण पूल जाल्लो जाल्यार पर्वरी- करासवाडो रस्त्या वयलो ताण बरोच उणो जावपाचो.

स पदरी उड्डाण पुलाची खरेंच गरज आशिल्ली, असो प्रस्न जायते जाण विचारतात. पूण फुडल्या 15 वर्सांचो विचार केल्यार होच न्हय, तर हेर कडेनूय पूल, रुंद रस्ते जावंक जाय. मात ही अशक्य गजाल दिसता. कारण कांय कडेन एकमेकां सामकार आयिल्ल्यो ल्हान मोटारी पसून सुटनात, इतले अशीर रस्ते आसात. ते रुंद करपाक मेळनात, कारण दोनूय वटेन घरांचे बेडरुम, सालां रस्त्याक तेंकल्यांत. दुकानां आसात. राजकी पक्षांच्या फुडाराचेर वायट परिणाम जावं येता, ह्या भंयान कोण तीं घरां मोडपाक वचनात. ताका लागून रस्त्यां वयली येरादारी उणी करपाक, पर्यायी रस्ते दिवपाक सरकाराक वेगळो विचार करचो पडटलो. लोकां कडल्यान सुचोवण्यो मागल्यार हाचेर उपाय सांपडूं येता.
फाटलें देड वर्स पर्वरेच्या उड्डाण पुलाचें काम चलता. ते आनीक वर्सभर तरी चलतलें. सध्या वयले स्पॅन बसयतात. दुर्घटना जांव येता म्हूण येरादारी दुसरे कडल्यान वळोवपाक काल ट्रायल रन घेतलो. तो पुरायेन फसलो. कारण पर्वरेच्यान पणजे पावपाक बऱ्याच जाणांक एक ते दोन वरां लागलीं. पोरू आॅगस्टांत घेतिल्ल्या ट्रायल रना वेळार व्हडलीशी अडचण येवंक नाशिल्ली. कामाच्या वेळार हो रस्तो पुराय बंद दवरप शक्य ना, कारण हांगाच्यान वचपी येरादारी खूबच वाडल्या. दुचाकींचेर तरी दोग जाण आसतात, पूण भोवतेक मोटारींनी फक्त ड्रायव्हर. घरांतले तीग जाण तीन गाडयो घेवन आयल्यार येरादारीची कोंयडी कित्याक जावची ना? तातूंत भितरल्या जोड रस्त्यां वयल्यान येवपी गाडयोय वाडल्यात. म्हणटकच तांकां थोडो वेळ दिलो तरी मुखेल रस्त्या वयली येरादारी तुंबता. सुकूर, हळदोणें, बिठ्ठोण, पोंबुर्फा ह्या रस्त्या वयल्यान येरादारी स म्हयन्यां पयलींच वळोवपाक जाय आशिल्ली. थंयच्यान बसी सोडल्यार खाजगी गाडयांचो आंकडोय उणो जावं शकतालो. लायटीचे फोकस बसोवन रातच्या वेळार उड्डाण पुलाचें काम करूं येता. करतात जाल्यार ताका गती मेळची. कारण त्या वेळार येरादारी उणी आसता. हें शक्य ना जाल्यार सकाळीं 8 ते 10 आनी सांजच्या 5 ते 7 मेरेन तरी गाडयांक मुखेल रस्तो उक्तो दवरून काम करूं येता. पर्वरे जिवोत्तम मठ वाठारांत चार रांको करून वचपी गाडयो मुखार एके रांकेंत वतात आनी येरादारी आडकून उरता. थंय दोन रांको करपाक जागो आसा. म्हणटकच येरादारी वेवस्थापन चुकलां. सुटयेच्या दिसांनी चड वेगान काम जावचें. मुळांत येरादारी सवकास जाल्या ती रस्त्यां वयल्या फोंडकुलांक लागून. बांदकाम खात्याचें हें काम. पर्वरे थोडो रस्तो दुरुस्त केला. पूण उरिल्लो रस्तो सामकोच इबाडला. तो दुरुस्त केल्यार, भितरले रस्ते रुंद केल्यार, रस्त्या कुशीक पार्क केल्ल्यो गाडयो काडल्यार कोणाक आडमेळीं जावचीं नात. भौशीक येरादारी सुदारपाक जाय. पूण येरादारी मंत्र्यांचें हाचेर लक्ष ना, अशें दिसता. बसी वाडल्यार आनी तातूंतल्यो थोड्यो मिरामार मेरेन गेल्यार खाजगी गाडयांचो आंकडो देंवतलो.
उड्डाण पूल जातकच ताचे वयल्यान फक्त खाजगी गाडयो, व्हडले म्हालवाहू ट्रकूच व्हरपाक मेळटले वा थेट पणजे वचपी बसी. वराराच्या बसींक सकयल्यानूच वच्चें पडटलें. कारण पेडणें, दिवचल, वाळपयच्यान येवपी बसी पर्वरी वाठारांत पांच तरी स्टाॅप घेतातूच. सध्याचो येरादारी डेटा वापरून 2047 चें नियोजन आतांच करपाक जाय.
रायबंदर, चोडण पूल जाल्लो जाल्यार पर्वरी- करासवाडो रस्त्या वयलो ताण बरोच उणो जावपाचो. सरकारी कार्यालयांचें वेळापत्रक बदलीत जाल्यार सकाळ, सांजच्या वेळार जावपी येरादारीची कोंयडी उणी जातली. शाॅर्ट कट मार्गां वयल्यान बसी सुरू जावच्यो. येरादारीचो अभ्यास जाय. केबिनांत बसून करपाचीं हीं कामां न्हय!