भांगरभूंय | प्रतिनिधी
लोकसभेंतले विरोधी पक्ष फुडारी आनी काँग्रेस पक्षाचे सर्वेसर्वा राहुल गांधी हांणी हालींच अणुबॉम्ब आनी हायड्रोजन बॉम्ब फुट्टले अशे शिटकावणे सयत धमकीच केंद्रांतल्या नरेंद्र मोदी सरकाराक दिल्ली. तांचे हे बॉम्ब उत्तर भारतांत उटंगाराच्या पडत आशिल्ल्या पावसांत शेळेले काय कितें हें कळपाक मात मार्ग ना. पूण काँग्रेसीचे आनीक एक ज्येश्ठ फुडारी पी चिदंबरम हांणी मात ऐन दिवाळेक एका फाटल्यान एक अशे ‘बॉम्ब’ फोडप सुरूच केलां. पूण ह्या बॉम्ब स्फोटांत काँग्रेसीचो धूप बी जावचो ना मूं असो प्रस्न खूबशा जाणांक पडला. काँग्रेस आनी हेर विरोधी पक्षां खातीर आयचे गोंदळाचे राजकी परिस्थितींत प्रतिश्ठेच्या थारिल्ल्या बिहार राज्य विधानसभा वेंचणुकेचे फाटभुंयेरच पी चिदंबरम हांणी भाजपाच्या हातांत अशीं कांय शस्त्रां सोंपयल्यांत की ताचो वापर कसो आनी केन्ना करचो हें सांगपा खातीर तांकां कोणाच्याच सल्ल्याची गरज ना. 1884 वर्सा ‘ऑपरेशन ब्ल्यू स्टार’ ह्या नांवा खाला केल्ली कारवाय म्हणल्यार एक व्हड पावल आशिल्लें, आनी तेन्नाच्यो प्रधानमंत्री इंदिरा गांधी हांची मोटी चूक आशिल्ली अशें उलोवप करून पी चिदंबरम हांणी आनीक एक असो बॉम्ब फोडलो की ताचे घावे काँग्रेसीक आतां खूबसो काळ सोंसचे पडटले. तेन्नाच्यो प्रधानमंत्री इंदिरा गांधी हांकां ते खातीर आपलो जीव व्हगडावचो पडलो अशी पुस्ती जोडपाकूय पी चिदंबरम विसरले नात, आनी तातूंतल्यान जावपी परिणामाचोय विचार तांणी केल्लो दिसना.
पी चिदंबरम हे सादे व्यक्तीमत्व न्हय की जांच्या उलोवपा कडेन देशान आडनदर करची. केंद्रांत गृह मंत्री तशेंच अर्थ मंत्री ह्या सारक्या पदांची जबाबदारी एका काळार सांबाळपी पी चिदंबरम हांणी एका फाटोफाट एक अशीं दोन उलोवपां करून आपल्या पक्षाक इतले अडचणींत हाडल्यात की तातूंतल्यान भायर सरतना पक्षाक खरस काडची पडटली, आनी ताचें मोलूय घडये तांकां मेजचें पडटलें. ‘ऑपरेशन ब्ल्यू स्टार’ कारवाये विशीं केल्ल्या विधानान आदल्यो प्रधानमंत्री इंदिरा गांधी हांच्या हौतात्म्याचेर प्रस्न उपस्थीत करपाची संद तांणी भरतीय जनता पक्षाच्या फुडाऱ्यां सयत खूबशा जाणांक दिल्या आनी ही संद व्हगडावपा इतले भाजपाचे सद्याचे फुडारी पिशे नात हेंवूय रोखडेंच दिसून आयलें. पी चिदंबरम हांणी हालींच अशेंच आनीक एक उलोवप केल्लें की जातूंत तांणी मुंबयंतल्या आतंकवादी हल्ल्याचो बदलो घेवपा पसून आमकां त्या वेळार विदेशी शक्तींनी कशे आडायले हाचो तांणी कबुली जबाबूच दिलो. प्रधानमंत्री नरेंद्र मोदी हांणी ताचे उपरांत त्या विधानाचो बिहार वेंचणूक प्रचारांत वापर करतना कशें राजकी भांडवल केलें हें देशान पळयिल्लेंच आसा. अशे परिस्थितींत पी चिदंबरम हांणी आनीक स्फोट घडोवन हाडलो आनी ताका लागून काँग्रेस पक्षांत खवदळ पडला. स्वपक्षाचीच कोंयडी ह्या उलोवपान चिदंबरम हांणी केल्या आनी पक्षांत सद्या जें कांय फुडारी उरल्यात तांणी ताचेर स्पश्टपणान निरशेवणी उक्तावन कपलार हात मारून घेतला.
इंदिरा गांधी हांणी आपली सत्ता तिगोवन दवरपा खातीर 1975 वर्सा देशाचेर लादिल्ली आणिबाणीचो विसर आयजूय लोकांक पडिल्लो नासतना वा काँग्रेसीक तांचो भूतकाळ दाखोवन दिवपाक सत्ताधारी पक्षाचे फुडारी आयजूय कसलीच संद व्हगडावपाच्या मुडांत नासतना पी चिदंबरम हांणी केल्लें उलोवप म्हणल्यार काँग्रेसीक अजून संकश्टाच्या खोलांत धुकलून दिवपीच आसा अशेंच म्हणचें पडटलें. भाजपान काँग्रेसीचेर ताच्या आदाराचेर निशाणो सादप हें अपेक्षितूच आशिल्लें. पी चिदंबरम खरें आसा तेंच उलयले. तांचेर आतां कारवाय करतले? असो प्रस्न करून तांणी काँग्रेसीक चिमटो काडला. काँग्रेस पक्षान देशाचेर राज्य करतना केल्ल्यो घोडचुको चिदंबरमा सारके फुडारी कळावान काय जायना मान्य करीत आसात आनी देशा मुखार त्यो येत आसात अशे तरेचें उलोवप करून भाजप सद्या काँग्रेसीक चिमटो काडीत आसा आनी ताका जाप दिवपाची नैतीक धिटाय आयज काँग्रेस पक्षा कडेन ना हें मान्य करचेंच पडटलें. ‘ऑपरेशन ब्ल्यू स्टार’ ह्या नांवा खाला आतंकवाद्यां आड केल्ली कारवाय राष्ट्रीय अनिवार्यता नाशिल्ली जाल्यार ती मोहीम म्हणल्यार राजकी दुस्साहस आशिल्लें आनी हें ऑपरेशन टाळूं येतालें हेंच पी चिदंबरम हांच्या उलोवपांतल्यान सुचीत जाता अशाच शब्दांत भापाच्या फुडाऱ्यांनी काँग्रेसीचो जो समाचार घेतला तो योग्यूच दिसून येता. त्या वेळा वेले परिस्थितींत ‘ऑपरेशन ब्ल्यू स्टार’ गरजेचें आशिल्लें. पूण ताची अंमलबजावणी करपाची पद्दत चुकली आनी इंदिरा गांधी हांचे खातीर ती घातक थारली आनी तांकां आपलो जीव व्हगडावचो पडलो हें सांगतना पी चिदंबरम हांणी मात्सो बुद्धीक ताण दिल्लो जाल्यार इंदिरा गांधी हांच्या ‘हौतात्म्या’चेर आपूणच प्रस्न उपस्थीत करीत आसा हें तांकां कळून येवपाचें.
काँग्रेसी खातीर ही एक मोटी अडचण थारूंक शकता हातूंत दुबाव ना. आनी बिहार विधानसभा वेंचणुकेच्या तोंडार भाजपाच्या हातांत परिणामकारक अशें अस्त्र हाताक लागिल्ल्यान ताचो वापर तांचे कडल्यान उक्तेपणान जातलो हातूंत दुबाव बाळगुपाचें कारण ना. शिखांचें सामकें पवित्र धर्मीक थळ आशिल्ल्या सुवर्ण मंदिरांतल्यान जर्नैलसिंग भिंद्रनवाले सयत हेर आतंकवाद्यांक भायर काडपा खातीर 1 ते 10 जून 1984 मजगतीं ‘ऑपरेशन ब्ल्यू स्टार’ ही लश्करी कारवाय केल्ली आनी ताचे उपरांतूच पंजाबांत हिंसाचाराचें फुडलें पर्व सुरू जालें हो इतिहास तसो अजूनय देशवासियांचे यादींत कोरांतून आसा. हे कारवायेन भारतीय राजकारण, समाज, धर्म आनी राष्ट्रीय एकतेचेर दीर्घकालीन परिणाम केले हेंवूय स्पश्ट आसा. सुवर्ण मंदीर परतून मेळोवपा खातीर ही कारवाय करप योग्य मार्ग नाशिल्लोच हे विशींचें दुमत आसपाचें कारण ना. पूण पी चिदंबरम हांणी अशा वेळार हो मुद्दो उपस्थीत केलाे की तांच्याच पक्षाक ताचें राजकी मोल मेजचें पडटले अशेंच दिसता. विरोधी पक्ष फुडारी राहुल गांधी हांची विधानां काँग्रेस पक्षांतूच कोण गंभीरतायेन घेतना दिसून येनात आनी आतां पी चिदंबरम हांणी परिस्थितीची गंभीरताय वळखिनासतना आपल्याच पांयार कुराड मारून घेवपी विधानां प्रसिद्धी खातीर करची हाचें सगल्यांक अजाप दिसप सहाजिकूच आसा. काँग्रेसी भितर हाचे वेल्यान खवदळ पडप अपेक्षितूच आशिल्लें. पूण शिवधोणूंतल्यान बाण सुटला. फुडल्या कांय दिसांनी ताची बरीच राजकी अस्थिरताय निर्माण जातली. काँग्रेस ताका कशी जाप दितली हें पळोवपा सारकेंच आसा. तरी तो मेरेन त्या पक्षांत ‘चिदंबरा चिदंबरा’ ही एकूच गजाल आयकूंक येतली. काँग्रेस पक्षाचो ‘हात’ आनी पांय लेगीत आनीक खोलांत वचपाचेच हे स्पश्ट संकेत दिसून येतात.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
