भांगरभूंय | प्रतिनिधी
भांगरभूंय । प्रतिनिधी
पेडणेः तुयें पंचायत वाठारांत सध्या जी उदकाची समस्या आसा ती झुजा पांवड्यार सुटावी करतले अशी म्हायती मांद्रेचो आमदार जीत आरोलकार हांणी दिली. तुयेंच्या पंप हावसाची पळोवणी केल्या उपरांत ते थळाव्या पत्रकारां कडेन उलयताले.
तुयें पंचायत वाठारांतल्या भोम आनी गांवकार वाडो वाठारांतल्या लोकांक उदकाची समस्येक तोंड दिवचें पडटा. तांणी आरोलकार हाचे सामकार ती मांडली. उपरांत तांणी सोमाराक पंप हावसाक भेट दिवन उदका विभागाचो अधिकारी संदीप मोरजकारा कडेन चर्चा करून उदकाची समस्या कित्याक उप्रासता, पंप हावसा लागीं आशिल्ले बायेंत जाय तितलें उदक आसून लेगीत लोकांच्या नळांक उदक कित्याक येता अशें मोरजकार हांका विचारलें. वीज पुरवण खंडीत जाता आनी ताचो परिणाम उदका पुरवणेचेर जाता अशें तांणी सांगलें. पंप हावसांत नवो जनरेटर बसोवपा विशी वीज मंत्री सुदिन ढवळीकार हांचे कडेन उलोवणी करून ही समस्या सुटावी करतलो अशें आमदार आरोलकार हांणी सांगलां.
पुराय पेडणे तालुक्याक उदका पुरवणेची समस्या आसा. चांदेलच्या उदका पुरवण प्रकल्पाची तांक कमी आशिल्ल्यान ही समस्या तयार जाता. ताका लागून थंय नवो प्रकल्प उबारपाच्या कामाक सरकारान गती दिल्या. पंचायत वेंचणुको जातकूच अधिकाऱ्यां कडेन चांदेल प्रकल्पा विशीं आपूण चर्चा करतलो. तुयें हांका नवो उदका प्रकल्प उबारपा खातीर यत्न करतलों अशें आरोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
