भांगरभूंय | प्रतिनिधी
गोंयांत 365 दिसूय पर्यटक येतात. तांचे कडल्यान मेळपी येणावळीचेर राज्य चलता ही बरी गजाल, पूण तांकां लागून गर्दी जाता, येरादारीक आडमेळीं, आवाजाचें प्रदुशण जाता ही वायट गजाल. अशें आसलें तरी वाडटी गर्दी म्हणल्यार पर्यटनाची चड संद. गोंय देशांतूच न्हय, तर संवसारांत प्रसिद्ध आसा. हांगाच्यो दर्यावेळो सगल्यांक आकर्शित करतात. तशेंच देवळां, चर्ची, मशिद लेगीत आकर्शणाचें केंद्र आसा. मुद्दाम सांगपाची गजाल म्हणल्यार, हांगाचे लोक शांतताप्रिय, केन्नाच केस्तांवां करचे नात, वाद घालचे नात, म्हूण प्रसिद्ध आसात. हांगाचें वातावरणूय शांत आसा. जशीं हाॅटेलां आसात, तशे पयशेकारां खातीर कॅसिनो आसात. खंयूय वतलो जाल्यार रेंट अ बायक, कॅब आसा. पर्यटकांक जपपी खाजगी टॅक्सीसेवाय आसा.
पर्यटकांची गर्दी जाता, ताचे फाटलें कारण ड्रग्स बी ना मूं, असो प्रस्न कोणूय विचारपाक शकता. तें आमी कुशीक दवरूंया आनी हाॅस्पिटॅलिटी म्हणल्यार सरबराय ह्या फांट्यान आशिल्ल्यो संदी पळोवया. कॅसिनोंनी साबार नोकऱ्यो आसात. पूणय जर तुमी जिमांत वचून कूड बळिश्ट करश्यात तर बावन्सर, सुरक्षा रक्षक म्हूण सहज नोकरी मेळपाक शकता. एखादो राजकी फुडारीय तुमका आपलो अंगरक्षक म्हूण दवरपाक शकता. हाॅटेलांत तर कूक, वेटर, क्लार्क म्हूण नोकरी मेळटा. तुमी बरें काम करश्यात जाल्यार तीन, पांच, सात तारांकीत हाॅटेलांनी व्हडल्या पगाराची नोकरी मेळटा. गोंयांत पर्वरे हाॅटेल मॅनेजमेंट संस्थेंत तर प्रवेश घेवपाक गर्दी आसता. वेर्णा साळगांवकार कंपनीची संस्था आसा. जी तुमकां बीएससीची पदवी दिता.
खंयचेय संस्थेंत प्रवेश घेतना ती विद्यापीठा कडेन संलंग्न आसा, थंय शिकिल्ल्यांक नोकरी मेळ्ळ्या काय ना, ते संस्थेची वेबसायट आसा काय ना, तिचो आदलो रेकाॅर्ड कसो आसा, ताची बारीकसाणेन चवकशी करात. मागीरुच मुखार पावल उबारूंक जाय. प्लेसमेंट जाणा जावन घेयात. ते संस्थेक भेट दियात, थंय पयलीं शिकिल्ल्यां कडेन तुमकां जाय ती चवकशी करात. हालींच्या काळांत जायरातबाजी खूब वाडल्यात. जायरात, वेबसायटीचेर म्हायती आसता, व्हडले दावे केल्ले आसतात, पूण प्रत्यक्षांत भलतेंच आसता. वेबसायटी ह्यो जायरात करपी एक सुवात जाल्या. तेन्ना वेबसायटीचेर पुराय अवलंबून रावचे परस, प्रत्यक्ष भेट दिवप बरें. वांगडा पालकाक वा एखाद्या जाणकाराक व्हरात.
सरबराय मळा वयलें आनीक एक म्हत्वाचें करियर म्हणल्यार पर्यटक गायड. तुमी संबंदीत थळाचो इतिहासा सांगपाचें काम करुं शकता. ते खातीर वेबसायट सुरू करूं शकतात वा पाॅडकास्ट माध्यमाचो वापर करूं येता. तुमकां जर आवड आसा, तर हातूंत करियर करूं येता. मात 2- 3 भाशा बऱ्यो उलोवपाक येवपाक जाय. खास करून हिंदी, इंग्लीश. गोंय, देशाचो इतिहास अभ्यास करी सारको. पूण ते योग्य तीं पुस्तकां, संदर्भ वापरचे. कारण आयजकाल दिशाभूल करपी साबार साहित्य इंटरनेटांचेर मेळटा.
गायड म्हूण काम करता तेन्ना पर्यटक तुमचे विस्वास दवरता. ताचो विस्वासघात जावंचो ना हाची आमी खबरदारी घेवंक जाय. ते खातीर अभ्यास, वाचन जाय. बरें साहित्य, ज्येश्ठ गायडाचें मार्गदर्शन घेवप, तांचीं उलोवपां आयकप गरजेचें. सुकणीं, प्राणी हांचोय अभ्यास करून गायड जावं येता. रातचें मळब पळोवन तुमी तारे, गिरे हांची म्हायती दिवपाक शकतात. ते खातीर टेलेस्कोप मात घेवचो पडटलो. ज्या विशयाचें मार्गदर्शन तुमी पर्यटकांक करतले, ताचें गिन्यान तुमकां जायच. प्रमाणपत्र अभ्यासक्रम आसलो तरी चड शिकले, वाचलें म्हूण फुकट वचना. उरफाटे तुमचें ज्ञान वाडटलें. तुमकां शिकोवप्याक, पर्यटकाक तुमची अपुरबाय दिसतले.
आमचो गोंयचो दर्यो 105 किलोमिटर लांब आसा. तुमी पेंवपाक फिशाल आसल्यार पर्यटकांत तुमी शिकोवं शकतात. उदकाच्या साहसी खेळ पर्यटकांक वांगडा घेवन करपाक शकतात. गोंयांत शेंकड्यांनी लोक हे उदका खेळ आयोजीत करतात. तांकां पर्यटन खात्याची मान्यता आसा.
सरबराय मळाचेर आयज व्हडली संद आसा. आनीक जायत्यो गजाली आसात. जेवणाची पुरवण करप, येरादारीची सुविधा दिवप. म्हयन्याक नोकरेंत मेळटा ताचे परस तीन पटींनी तुमी जोडपाक शकतात. तें कितेंय आसलें तरी तुमी बेकार उरचे नात, हें मात खरें. सरबराय मळाचेर यशस्वी जावपाक अभ्यास, शिस्त, संयम, संवाद जाय. अतिथी देवो भवा हें मात घट मतींत दवरपाक जाय.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
