मानवी आत्म्याक कसलीच मर्यादा ना

भांगरभूंय | प्रतिनिधी

मुख्यमंत्री : आंतरराष्ट्रीय पर्पल फेस्ताचो समारोप

भांगरभूंय । प्रतिनिधी

पणजी : आंतरराष्ट्रीय पर्पल फेस्त 2025 ह्या उत्सवांतली दरेक गजाल आमकां उगडास करून दिता, मानवी आत्म्याक कसलीच मर्यादा ना. पर्पल फेस्तान सिक्षण आनी रोजगाराच्या मळार लेलगीत नवे संदींची माची निर्माण केल्या. कार्यशाळा, चर्चा आनी प्रदर्शनांक लागून अदीक समावेशक शिक्षम आनी कार्यसंस्कृती खातीर दारां उक्तीं जाल्यांत, अशें मुख्यमंत्री डॉ. प्रमोद सावंत हांणी सांगलें. आंतरराष्ट्रीय पर्पल फेस्त 2025 समारोप सुवाळ्यांत ते उलयताले.

आंतरराष्ट्रीय पर्पल फेस्त 2025 आतां आमच्या देशांतलो सगल्यांत अर्थपूर्ण आनी प्रबावी उत्सवांतलो एक जाला. ह्या उत्सवान विविध मळा वयल्या लोकांक एकठांय हाडल्यात. हो उत्सव म्हणल्यार आमी अभिमानान ‘पर्पल इकॉनॉमी’ म्हणटात ते संकल्पनेची सुरवात आसा. समाजीक आस्पाव आनी उदरगत हातांत हात घालून चलतात. दरेक व्यक्ती त्या प्रवासाचो वांटो आसतात. ताका लागून समाज अदीक घटमूट जाता, अशें मुख्यमंत्र्यान सांगलें.

आपल्या उलोवपांत मुख्यमंत्र्यान राष्ट्रपतींच्या संदेशाचो उल्लेख केलो. ‘हांव दोळ्यांनी पळोवपाक शकना, पूण हांव मनान पळयतां. आनी जें हांव पळयतां तें म्हणल्यार शक्यतायांनी भरिल्लो एक सुंदर संवसार.’ हीं उतरां पर्पल फेस्ताच्या आत्म्याक जुस्त धरतात. हे यत्न सुनिश्चीत करतले, दिव्यांग व्यक्ती आपले उदरगतीच्या प्रवासांत सक्रीय फुडारी जातले. शिक्षण दिता सक्षमीकरण, रोजगार दिता सन्मान आनी हे दोनूय मेळून तयार करतात स्वातंत्र्य आनी आस्पावाची बुन्याद, अशें मुख्यमंत्र्यान म्हणलें.

केरळचे राज्यपाल राजेंद्र आर्लेकार हांणी सांगलें, पर्पल फेस्त ही आमच्या दिव्यांगजनां खातीर एक बरी संद आसा. आपले मदली कला, प्रतिभा, कुळटाय दरेका मुखार सादर करपाची एक बरी संद आसा. ह्या सगल्या भुरग्यां मदीं वा जाण्ट्यां मदीं आशिल्ली कसलीय कला केन्नाच भायर पळयनात. जेन्ना आमी असो उत्सव आयोजीत करतात, तेन्ना आमी तांकां संद दितात. ते आमचे दयेचेर नात. तांकां आमी संद आनी सुविधा दिवपाक जाय, अशें तांणी सांगलें.

गोंयचे राज्यपाल गडापती पुसापती राजू हांणी सांगलें, गोंयान सगल्यांत सोबीत असो आंतरराष्ट्रीय पर्पल फेस्त 2025 आयोजीत करून लोकांच्या मनांत घर केलां. दिव्यांगजन धर्मादाय संस्थांचे लाभार्ती नात, जाल्यार ते समान हक्कधारक आसात. समान नागरीक प्रतिश्ठा, संद आनी जिणेंतल्या दरेका मळार वांटो घेवपाक पात्र आसात. हें घटनात्मक बंधन आसा, हाचो उगडास पर्पल फेस्त करून दिता. सबका साथ, सबका विकास, सबका विश्वास, सबका प्रयास ह्या प्रधानमंत्र्यान मारिल्ल्या उल्याक प्रेरीत जावन पर्पल फेस्त हो उरिल्ल्या देशा खातीर एक आदर्श मॉडेल आसा. एकवटान आमी एक सक्षम भारत तयार करपाक शकता, अशेंय राजपालांनी सांगलें.