गोंयांत कुटंबीक समस्यांक लागून आत्महत्या करपी चड

भांगरभूंय | प्रतिनिधी

एका वर्सांत 5 टक्क्यांनी वाड

भांगरभूंय । प्रतिनिधी

पणजी : फाटल्या कांय वर्सांत गोंयांत आत्महत्येचें प्रमाण वाडलां. कुटुंबीक समस्यांक लागून आत्महत्या करप्यांचें प्रमाण सगल्यांत चड आसा. गोंयांत 2022 त वट्ट 302 आत्महत्यांची नोंद जाल्ली. तातूंतल्यो 63 आत्महत्या (20.86 टक्के) ह्यो कुटुंबीक समस्यांक लागून जाल्ल्यो. 2023 त वट्ट 327 मदल्यो 86 आत्महत्या (26.29 टक्के) ह्यो कुटुंबीत समस्यांक लागून जाल्ल्यो. कुटुंबीक समस्यांक लागून जावपी आत्महत्यांचें प्रमाण एका वर्सांत 5.43 टक्क्यांनी वाडलां. राष्ट्रीय गुन्यांव नोंदणी विभागाच्या (एमसीआरबी) ‘भारतांतलीं अपघाती मरणां आनी आत्महत्या 2023’ ह्या अहवालांतल्यान ही म्हायती मेळ्ळ्या.

अहवाला प्रमाण, दोनूय वर्सा कुटुंबीक समस्यां उपरांत आत्महत्येचें दुसरें मुखेल कारण मानसीक वा शारिरीक दुयेंस हें आशिल्लें. 2022 त वट्ट 81 दुयेंत व्यक्तींनी आपली जीण सोंपयली. ते उपरांत घुंवळे वखदां वा सोऱ्याचें वेसन आशिल्ल्यान आत्महत्या करपाचें प्रमाण चड आशिल्लें. 2022 त 31 (10.26 टक्के) जाल्यार 2023 त 29 (8.86 टक्के) वेसन लागिल्ल्या व्यक्तींनी आत्महत्या केल्ली. 2022 त प्रेम प्रकरणांतल्यान 27 जाणांनी आत्महत्या केल्ली. 2023 त लेगीत 27 जाणांनी ह्याच कारणाक लागून आत्महत्या केल्ली, अशें अवहालांत म्हणलां.

कांय प्रकरणांत आत्महत्येचें नेमकें कारण स्पश्ट जावंक ना. 2022 त 25 जाल्यार 2023 त 37 जाणांनी आत्महत्या कित्या खातीर केल्ली हाची म्हायती मेळपाक शकली ना. 2022 त रिणाक लागून खाकनवाळ जाल्ल्यान 18 जाणांनी आत्महत्या केल्ली. 2023 त ही संख्या उणी जावन 10 जाली. 2022 त नोकरी, वेवसाय नाशिल्ल्यान 14 जाणांनी, जाल्यार 2023 त 12 जाणांनी आत्महत्या केल्ली. 2022 त गरिबीक लागून एके व्यक्तीन जाल्यार 2023 त 4 जाणांनी आत्महत्या केल्ली. 2022 त परिक्षेंत येस येवंक नाशिल्ल्यान 4 विद्यार्थ्यांनी आत्महत्या केल्ली. 2023 त ह्या कारणाक लागून एकूय आत्महत्या जावंक ना.

दादल्यांचें प्रमाण चड

गोंयांत 2022 चे तुळेंत 2023 त आत्महत्यांचें प्रमाण 8.2 टक्क्यांनी वाडिल्लें. 2022 त वट्ट 302 व्यक्तींनी आत्महत्या केली. 2023 त 327 जाणांनी आत्महत्या केली. 2022 त 232 दादले आनी 70 बायलां, जाल्यार 2023 त 249 दादले आनी 78 बायलांनी आत्महत्या केल्ली.