भांगरभूंय | प्रतिनिधी
35 मदले 31 प्रकल्प पुराय
बसस्टॉप आडकल्ल्यान प्रवाश्यांची गैरसोय
शारांत चल्ल्यांत 27 कोटींचीं तीन कामां
भांगरभूंय । प्रतिनिधी
पणजी : स्मार्ट सिटी मिशन खाला पणजी शाराची उदरगतीचीं कामां निमाण्या पांवड्यार पावल्यात. फाटल्या 10 वर्सांत हातांत घेतिल्ल्या 35 मदल्या 31 प्रकल्पां सयत 91 टक्के काम पुराय जाल्ल्याची म्हायती प्रशासनान दिल्या. मात शाराचे भौशीक येरादारीचो कणो आशिल्ले बसस्टॉप आडकल्ल्यान प्रवाश्यांची व्हड गैरसोय जाता. स्मार्ट बशी शारांत धांवतात, पूण स्मार्ट बसस्टॉप नाशिल्ल्यान हे येवजणेचेर प्रस्नचिन्न निर्माण जालां.
इमॅजीन पणजी स्मार्ट सिटी विकास म्हामंडळाच्या (आयपीएससीडीएल) म्हायती प्रमाण, स्मार्ट क्लासरूम, घनकोयर वेवस्थापन आनी मांडवी न्हंयेदेगेर ‘मांडवी प्रोमेनेड’ हे सारकिल्ले प्रकल्प पुराय जाल्यात. सध्या शारांत सुमार 27 कोटीं रुपयांचीं तीन कामां चालू आसात. तातूंत पाटो वाठाराची उदरगत, आल्तिनोर उदकाची टांकी आनी पणजी खाडी वयल्या चलून वचपी मार्गाचो आस्पाव आसा. ते भायर रायबंदर वाठारांत 7.73 कोटी रुपयांच्या कम्युनिटी मार्केटाचेंय काम चालू सा. पूण आराखड्यांत बदल केल्ल्यान ह्या कामाक ‘काम बंद’ मोटीस मेळिल्ल्यान ताचे गतीचेर परिणाम जाला.
शारांत नव्यो ईव्ही बशीं खातीर स्मार्ट बसस्टॉप उबारपाचो आनी पोरण्या बसस्टॉपांची दुरुस्ती करपाचो प्रकल्प आराखड्यांतले हरकतींक लागून पुराय तरेन आडखळ्ळा. खूब कडेन बसस्टॉपांचें फक्त अर्दवट शेडी उब्यो आसात. ताका लागून प्रवाश्यांक वत- पावसांत बशीची वाट पळयत रावचें पडटा. स्मार्ट बशी सुरू जाल्यो, पूण ताचे खातीर गरजेचे स्मार्ट बसस्टॉप नाशिल्ल्यान लोकां मदीं खर नाराजी आसा. हो प्रकल्प केन्ना पुराय जातलो, हे विशीं अधिकारी लेगीत दुबावांत आशिल्ल्याचें चित्र आसा.
अर्दवट कामांक लागून येसाक खत
स्मार्ट सिटी मिशनाची मुजत हे आदीं खूब खेपे वाडयल्या. उटंगाराचो पावस आनी शारांतली भुसभुशीत जमीन ह्या सारक्या कारणांक लागून कामांक कळाव जाल्ल्याचें ‘आयपीएससीडीएला’न न्यायालयांत लेगीत स्पश्ट केल्लें. शारान स्मार्ट सिटीचे दिशेन व्हड अंतर हुंपलां, तरी लेगीत बसस्टॉपा सारकी थेट लोकां कडेन संबंदीत प्रकल्प पुराय जावंक नाशिल्ल्यान ह्या येसाक खंयतरी खत लागलां. उरिल्लीं 9 टक्के कामां वेळा भितर पुराय करपाचेर ह्या मिशनाचें खरें येस अवलंबून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
