भांगरभूंय | प्रतिनिधी
पणजीः शुक्रारा रातीं उसरां आनी शेनवारा सांजवेळार राज्यांतल्या कांय वाठारांनी वीज गडगडाटा सयत व्हड प्रमाणांत पावस पडपाची नोंद जाल्या. पावसाक लागून पडझडीच्यो घडणुको घडल्यो. पावसाक लागून वातावरणांतली उश्णताय कांय प्रमाणांत उणी जाली. 12 ते 17 ऑक्टोबर ह्या काळांत राज्यांत कांय प्रमाणांत पावस पडपाची शक्यताय हवामान खात्यान उक्तायल्या. 24 वरांत राज्यांत 15 मिमी. पावसाची नोंद जाल्या.
शेनवारा पणजेचें तापमान चडांत चड 32.9 अंश आनी उण्यांत उणें तापमान 24.5 अंश नोंद जालें. मुरगांवां चडांत चड तापमान 29.6 अंश आनी उण्यांत उणें तापमान 24.8 अंश उरलें. फुडले स दीस राज्यांत चडांत चड तापमान 32 अंश ते उण्यांत उणें तापमान 25 अंश सेल्सियस मदीं उरपाची शक्यताय आसा. आयज (12 ऑक्टोबर) राज्यांत वाऱ्याचो वेग वराक 35 ते 55 किमी. आसपाची शक्यताय आसा.
12 ते 17 ऑक्टोबर ह्या काळांत राज्यांत पावसाची अलर्ट जारी करूंक ना. राज्यांत 1 ते 11 ऑक्टोबर ह्या काळांत सरासरी 2.03 इंच पावस पडला. ह्या काळांत पेडणें 4.17 इंच, धारबांदोड्यां 2.77 इंच आनी म्हापश्यां 1.72 इंच पावसाची नोंद जाल्या. महाराष्ट्रांतल्या कांय वाठारांनी पावस फाटीं सरला. फुडल्या कांय दिसांनी गोंयांतल्यान पावस फाटीं सरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
