भांगरभूंय | प्रतिनिधी
पणजी : आयच्या काळांत चलो आनी चली हातूंत फरक ना. समाजांत चलयां विशींचे गैरसमज पयस जावपाक जाय. हाचे खातीर समाजीक विचार बदलपा खातीर सगल्यांनी यत्न करपाची गरज आसा अशें बायलां आनी बाल कल्याण मंत्री विश्वजीत राणे हांणी सांगलें. आंतरराष्ट्रीय चलयो दिसा (International Day of the Girl Child) निमतान शेनवारा जीएमसींत आयोजीत केल्ले कार्यावळींत ते उलयताले. ह्या वेळार खात्याची संचालिक ज्योती देसाय, सचीव अरुण कुमार मिश्रा आनी जीएमसींचे अधीक्षक डॉ. राजेश पाटील हाजीर आशिल्ले.
शिक्षण, करियरा खातीर चलयांक तेंको दियात
आयज चलयो चल्यां वांगडाच दरेका मळार मुखार आसात. ‘चली शिकली जाल्यार पुराय कुटुंबाची उदरगत जाता’ हाची जायतीं उदाहरणां समाजांत आसात. योग्य तेंको आनी संद मेळ्ळी जाल्यार बायलां उत्कृश्ट काम करता. देखून चली जल्माक आयलां वायट मानप हे योग्य न्हय. चलयांक शिक्षण घेवपाक आनी करिअर करपाक पालकांनी मजत करप गरजेचें आसा. शिक्षण आसल्यार अर्थीक स्थिरताय आनी अर्थीक स्थिरताय आसल्यार हेर सगळें सारकें जाता. देखूनच चलयांक शिक्षण मेळप खूब गरजेचें आसा अशें मंत्री राणे हांणी सांगलें.
‘बेटी बचाओ’ चो परिणाम
प्रधानमंत्री नरेंद्र मोदी हांणी सुरू केल्ल्या ‘बेटी बचाओ बेटी पढ़ाओ’ मोहिमेक देशभरांत बरो परिणाम दिसून येता. बायलां आनी चलयांक सशक्त करप हें आमचें सगळ्यांचें कर्तव्य. ताचे खातीर भलायकी तशेंच बायलां आनी भुरगीं उदरगत खातें वावुरता. बरें काम करपाक मंत्री, आमदार वा वरिश्ठ सरकारी अधिकारी आसपाची गरज ना. सामान्य मनीस लेगीत समाजा खातीर काम करूंक शकता. चलयो आनी बायलां विशीं वायट भावना दवरचे नात अशी प्रतिज्ञा सगळ्यांनी करपाक जाय अशें मंत्री राणे हांणी सांगलें.
गुरवार बायलांचें समुपदेशन करपाचो विचार
गर्भाचें लिंग जाणून घेवपाक सोदपी कांय जाणांचे भलायकी खात्या वरवीं समुपदेशन करपाचो विचार करता अशें मंत्री राणे हांणी सांगलें. कायद्यान लिंग चांचणी हो गुन्यांव आसलो तरी लोकांची चड करून लिंग जाणून घेवपाची इत्सा आसता. ह्या समुपदेशनांतल्यान तांच्या मनांतले गैरसमज पयस जातले अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
