भांगरभूंय | प्रतिनिधी
पणजीः गोंय लोक सेवा आयोग (जीपीएससी) वेगवेगळ्या खात्यांतल्या 8 पदांचेर भरती करतले.
तातूंतली 5 पदा ट्रान्स्फर ऑन डेप्यूटेशनची आसात.
आयपीएचबींतल्या दोन व्याख्यातो आनी फार्मसी कॉलेजींत सहाय्यक प्राध्यापकाच्या एका पदा खातीर भरती जातली. ट्रान्स्फर ऑन डेप्युटेशना खातीर आयोगाच्या संकेतथळार ऑनलायन अर्ज करपाची निमाणी तारीख 24 नोव्हेंबर आनी हेर पदां खातीर 24 ऑक्टोबर आसा.
ट्रान्स्फर ऑन डेप्युटेशन पद्धतीन बदली करून जागृताय खात्यांत सहाय्यक तंत्रीक परीक्षकाचें एक पद भरतले. ते खातीर केंद्र वा राज्य सरकारांत सहाय्यक अभियंतो म्हणून काम करपी आसप गरजेचें. ताणें सिव्हिल इंजिनियरिंगांतली पदवी आसूंक जाय. अवर सचीव (कायदो) पद कार्मीक खात्यांत भरतले. हे खातीर उमेदवाराक कायद्याची पदवी आनी सात वर्सांचो अणभव आसपाक जाय.
गृह खात्या खाला ट्रान्स्फर ऑन डेप्युटेशन पद्धतीन बदली वरवीं 3 वैजकी अधिकारी भरती जातले. हे खातीर ती व्यक्ती गोंय वैजकी म्हाविद्यालयांत वा भलायकी खात्यांतल्या तत्सम पदाचेर काम करपी आसूंक जाय. आयपीएचबींत मानसोपचारांत व्याख्यातो अशीं दोन पदां भरतले. ते खातीर वैजकी मळार पदव्युत्तर पदवी आनी उण्यांत उणो तीन वर्सांचो अणभव आसप गरजेचें. हाचे खातीर पिरायेची मर्यादा 45 वर्सां आसा.
तंत्रीक शिक्षण खात्या खाला फार्मसी कॉलेजींत सहाय्यक प्राध्यापकाचें एक पद भरतले. ते खातीर पयल्या वर्गा वांगडा एम फॉर्म पास जाल्लो आसप गरजेचें. ऑनलायन वा ऑफलायन सगल्या पदां खातीर अर्ज शुल्क भरले उपरांत अर्ज स्विकारतले अशें आयोगान स्पश्ट केलां. अर्ज सादर करचे पयलीं उमेदवारांनी आयोगाच्या संकेतथळार आशिल्लीं सुचोवण्यो वाचूंक जाय. मेळिल्ल्या अर्जांची चवकशी करून फुडली भरती प्रक्रिया करतले अशें आयोगान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
