भांगरभूंय | प्रतिनिधी
दुर्घटना केन्ना जायत तें कोणूच सांगपाक शकना. तुमची कसलीच चूक नासतना अपघात जावंक शकता. मात कांय दुर्घटना कोणाचे तरी निश्काळजीक, बेफिकिरीक, अतिआत्मविस्वासाक लागून घडटा. पर्येंचे शाळेंत फॅन पडलो. चवथेंत शिकपी विद्यार्थिनीचो कान कापलो. जिवाचेर आयिल्लें संकश्ट टळ्ळें. फॅन तुटून पडपाच्यो घडणुको तश्यो सामक्योच दुर्मीळ. पूण गोंयांत जायते कडेन घडल्यात. हालींच काणकोणां एका शिक्षकाचेर तो पडिल्लो. पर्यां पडला तो फॅन मदल्यान तुटला. वयलो स्क्रू सुटूंक ना. (चडशे फॅन स्क्रू सुटून पडटात.) म्हणटकच ताचो दर्जो बाबत आसा, असो दुबाव घेवं येता. ह्या म्हालाचें टेंडर कोणाक दिल्लें, पुरवण करपी कोण ताची चवकशी जावची. कागदार एक मोल आनी प्रत्यक्षांत खरेदी वेगळ्या मोलान अशें बी घडलां? ताची म्हायती तपास यंत्रणां घेतलीच. सरकारी म्हालाचो दर्जो सारको नासता, असो सरळ आरोप कोणाकूय करपाक मेळटा. कारण आयज इमारती, प्रकल्प, शाळा, सीसीटीव्ही हांची काकुळट करी सारकी अवस्था आसा. मात, आमचे चडशे गोंयकार भाव, भयणी खूब सोंशीक. तांची केन्नाच, कसलीच कागाळ नासता. सलाम तांकां. फक्त थारावीक लोकूच आवाज काडटात. चवकशीचे आदेश सुट्टात. कांय दिसांनी प्रसंग विरघळून वता आनी सगले जाल्लें गेल्लें विसरून फुडले दुर्घटनेची वाट पळयतात. शिक्षण खात्यान हे दुर्घटनेचो बुडकूलो बांदकाम खात्याचे तकलेर फोडला. कारण दुरुस्तीचें काम पीडब्ल्यूडी करता. मात, कला अकादमी प्रकरणां सारकीं एकमेकांक बोटां दाखय नासतना हे दुर्घटनेची पूर्ण चवकशी करून दोशींक ख्यास्त जावची. ही शाळा हालींच दुरुस्त केल्ली खंय. म्हणटकच ह्या प्रकरणाचें गांभीर्य आनिकूय वाडटा.
थळावी आमदार डाॅ. देविया राणे हांणी ह्या प्रकारा खातीर माफी मागल्या. असल्याे दुर्घटना जावच्यो न्हय, म्हूण खबरदारी घेतले, अशेंय तांणी सांगलें. सगल्या शाळांचें पाखें, दुरीग, टाॅयलेट दुरुस्त करपाचेंय तांणी उतर दिलां. सत्तरींतल्याच न्हय, राज्यांतल्या सगल्या शाळांनी हें जावप गरजेचें. दोन वर्सां पयलीं सप्टेंबरांत पर्वरेच्या संजय स्कुलांत दुसऱ्या मजल्या वयलें रॅलिंग तुटून एक दिव्यांग विद्यार्थ्याचेर पडिल्लो. उपरांत ताका मरण आयिल्लें. कला म्हाविद्यालयांत फॅन तुटपाची घडणूक घडिल्ली खंय. 10 वर्सां पयलीं वास्को शाळेंत खेटाखेट जाल्ली.10 विद्यार्थी जखमी जाल्ले. वास्कोंतलेच शाळेंत घुसून एकल्यान चलयेचो विनयभंग केल्लो. आयज मेरेन तो तरणाटो सांपडूंक ना. खूब गाजिल्लें हें प्रकरण. बालरथाचेय अपघात जाल्यात.
शाळांनी सुरक्षा उपाय घेवंक जायच, पूण नेमान उपकरणांची तपासणीय करूंक जाय. फॅन वण्टींक आडवे बसोवं येतात वा एसी घालचे!! शाळेचें पयलें सत्र सुरू जावचे पयलीं, सुटयो सोंपचे पयलीं इमारत, पाखें, फॅन, लायटी, बाकडे, मेजां, खेळाचें सामान सगलें तपासपाक जाय. विद्यार्थी, शिक्षकांची बारीक नदर आसची. लायटीचें वायरींग, बटन, वाॅटर कुलराची इलेक्ट्रीशियनां कडल्यान अदींमदीं तपासणी करची. ह्या कामां खातीर संस्था, मंडळां, पालक – शिक्षक संघ देणगी दिवंक शकता. उजो पालोवपी यंत्रणां जाय. तीं कशीं वापरप तें शिक्षकांक शिकोवंक जाय. भुंयकांप, मोड आयल्यार कितें करपाचें ताचें प्रशिक्षण दिवं येता. शाळांक दोन दारां आसल्यार बरीं. सीसीटीव्ही कॅमेरे आनी सुरक्षा रक्षक बंधनकारक करचो. फर्स्ट एड कसो करचो, आपलें घर- पुलीस- फायरब्रिगेड- हाॅस्पिटलाचे फोन नंबर भुरग्यांक शिकोवपाक जाय. मैदान आनी सरभोंवतण नितळ आसची. झोपाळे, घसरगुंडीची तपासणी करुंक फावो. मदले सुटयेंत मैदानाचेर एका शिक्षकाची देखरेख आसूंक जाय. उदक, टाॅयलेट, वाॅश बेसीन सारकें आसचें. सुरक्षा अहवाल, सुरक्षा समिती, तर जायच.
शाळा हीं विद्येचीं देवळां. विद्यार्थी, शिक्षक तातूंत सुरक्षीत उरप ही सगल्यांचीच लागणूक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
