भांगरभूंय | प्रतिनिधी
कुंकळ्यें हो फक्त गांव न्हय, ती एक संस्कृताय. ही भूंय देव आनी मनीसपणाची. हांगाच्या पिकांत फक्त धान्य न्हय, तर परंपराय वाडटा, हांगाच्या मातयेचो वास आवयच्या आशिर्वादाच्या ओलसाणी सारको आसता. आमच्या गांवाची वळख म्हळ्यार शांती, भक्ती आनी सैमा कडेन संबंद. पूण ह्या सगल्यां मदीं आतां एक नवें संकश्ट आयलां, मोबायल टॉवर लावपाचें. आमी उदरगती आड नात. आयच्या काळांत संवाद, इंटरनॅट आनी मोबायल जोडणी गरजेची आसा हें आमकां खबर आसा. पूण उदरगत म्हणल्यार फक्त लोखणाचे टाॅवर न्हय, उदरगत म्हळ्यार लोकांची भलायकी, सूख आनी पर्यावरणाची शुध्दताय. जेन्ना ती उदरगत स्वता मनशाचे भलायकेक, जनावरांच्या जिविताक, सुकण्यांच्या उड्डाणाक आनी सैमाच्या समतोलाक धोको निर्माण करता तेन्ना ती उदरगत न्हय तर नाश. ताकाच लागून कुंकळ्यें गांव ह्या अन्याया आड उबो आसा.
कुंडय उद्देगीक वाठारांतल्या प्रदुशणाक लागून कुंकळ्यें गांव आनी भोंवतणचो वाठार पयलींच त्रासांत आसा. दर दिसा सकाळीं आमी जागे जातात तेन्ना एग्जॉस्टाचो वास, रसायनीक धुंवरांतल्यान दोळे जळटात आनी आवाज प्रदुशणाक लागून अस्वस्थ मन हीं आमचीं परिस्थिती जाल्या. कारखान्यांतल्यान भायर सरपी वायू आनी रसायनांक लागून हवेंतलें विखारीपण वाडत आसा. आतां मोबायल टॉवरांचें संकश्ट जोडल्यार आमच्या गांवाची आनी आमचे भलायकेची दोनूय स्थिती वायट जातली.
मोबायल टाॅवरांतल्यान भायर सरपी रेडियेशन दिसना, पूण तो हवेंत अदृश्य विखावरी पातळटा. अशा टाॅवरांतल्यान सतत जावपी रेडियेशनाचो परिणाम मनशाच्या मेंदवाच्या तरंगांचेर जाता अशें संवसारभरांतल्या संशोधनांतल्यान दिसून आयलां. तकली दुखप, घुंवळ येवप, न्हीद येवप, दोळ्यांची चिडचीड, एकाग्रताय उणी जावप, मानसीक थकवा येवप हीं लक्षणां सुरवातीच्या टप्प्यांत दिसतात. ह्या किरणांचो चड काळ संपर्कांत आयल्यार रोगप्रतिकार शक्त उणी जावंक शकता, हार्मोनांचें समतोल खंडीत जावंक शकता आनी कांय संशोधनांतल्यान कॅन्सराचोय धोको वाडटा. हे सगले परिणाम खास करून भुरग्यांक, गुरवार बायलांक आनी जाण्ट्यांक दिसतात. ह्या किरणांचो परिणाम फक्त मनशाचेर न्हय, तर सुकणीं आनी जनावरांचेरूय जाता. जायत्या सुवातींनी सुकण्यांचे घोंटेर मधमाशीच्या पोळ्यांत उणे जावपाचीं कारणां मोबायल टाॅवरांतल्यान भायर सरपी किरणांनी सांपडल्यात. तशेंच झाडांची वाड, फुलां फुलप आनी जमनींतल्या सूक्ष्म जंतूचें समतोल खंडीत जाता. ह्या सगल्यांचो शेतवडी, उदक आनी निमाणें मनशाच्या जिविताचेर परिणाम जाता.
ह्या सगल्याचे फाटभुंयेर सरकार आनी संबंदीत प्रशासनान घेतिल्ली भुमिका सामकी बेपर्वा आनी बेजबाबदार दिसता. लोकांक कळोवप, ग्रामसभा करप, आनी खंयच्याय गांवांत टॅवर लावचे पयलीं लोकसंमती घेवप ही तांची मुळावी जापसालदारकी. पूण आमच्या कुंकळ्यें गांवांत हें एकूय घडलें ना. गांवच्या लोकांक कळयलें ना, ना संमती, पारदर्शक प्रक्रियाय ना, आनी गांवांत थेट टाॅवर लावपाचो यत्न जालो. हो पुरायपणान गैरवेवस्थापन आनी लोकशाय वेवस्थेचो अपमान. ह्या गैरवेवस्थापनाक आमी विरोध करतात कारण खंयचोय निर्णय लोकांच्या हितांत आसचो ही सरकाराची आनी कंपनींचीय जापसालदारकी. लोकांचे भलायकेचेर, जमनीचेर, उदकाचेर आनी फुडाराचेर परिणाम करपी खंयचोच निर्णय लोकांक विचारले बगर घेवंक मेळना. आमची मागणी सामकी स्पश्ट आसा ‘गांवात आमकां टाॅवर नाका’.
कुंकळ्यें गांवाची वळख ताच्या एकचारांत आसा. आमी शिगमो, जागोर, देवी शांतादुर्गेची जात्रा हीं सगलीं एकठांय मनयतात. आतां त्याच एकचारान आमी आमची जमीन, मळब आनी भलायकेची राखण करपाचे आसात. आमकां सिग्नल नाका, आमकां जिणेचीं चिन्नां जाय. आमकां उदरगत जाय, पूण सैमा वांगडा. आमकां तंत्रगिन्यान जाय, पूण मनीसपणाच्या मर्यादे भितर. आतां गांवच्या लोकांक जागृत जावपाची वेळ आयल्या. आमी सगल्यांनी एकठांय येवन सरकारा मुखार घटमूट स्टॅण्ड मांडपाक जाय. ही फक्त एका टाॅवराची गजाल न्हय, हो आमचो हक्क, आमची भलायकी आनी आमच्या फुडल्या पिळग्यांचे हक्क राखपाचो हक्क. आमी जल्मल्ली जमीन निवळ, सुरक्षीत आनी शांत दवरप ही आमची जापसालदारकी. कुंकळ्यें गांवचें उतर म्हणल्यार, ‘आमी आमचें मळब विकचे नात, आमचो फुडार गमावचे नात. आमची माती, आमची भलायकी आनी आमच्या भुरग्यांची राखण करपा खातीर आमी एकठांय झगडटले. आमचो गांव कुंकळ्यें जियेतलो, सैमाच्या आशीर्वादांत, देवाच्या सावळेंत आनी लोकांच्या एकचारांत.
मनोज कुंकळयेंकार
9764215365
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
