भांगरभूंय | प्रतिनिधी
15 सीसीटीव्ही कॅमेरे बंद, आनीक 28 लावपाची येवजण पडून
भांगरभूंय । प्रतिनिधी
म्हापशें : म्हापशेंच्या शार आनी मार्केटांतल्या घडामोडींचेर टेळणी वरवीं देखरेख दवरचे खातीर म्हापशें पालिकेन लायिल्ले 15 सीसीटीव्ही कॅमेरे बंद पडल्ले अवस्थेंत आसात. मंगळारा गणेशपुरी वाठारांत डॉ. घाणेकार हांच्या घराचेर सशस्त्र दरोडो पडले परांत शारांतल्या सीसीटीव्ही कॅमेऱ्यांचो प्रस्न परतून साणीर आयला. गिरीच्या राष्ट्रीय म्हामार्गा लागसार आशिल्ल्या एके आस्थापनाच्या सीसीटीव्हीक लागून दोतोराची चोरयेक गेल्ली गाडी पणजेचे दिशेन गेल्ल्याचें पुलिसांक कळ्ळें.
पालिकेन मार्केटांत 2015 त सात सीसीटीव्ही कॅमेरे लायिल्ले. ते उपरांत 2018 त शारांतल्या कांय म्हत्वाच्या सुवातांचेर आनीक आठ अशें वट्ट 15 सीसीटीव्ही कॅमेरे पालिकेन लायिल्ले. ह्या सगल्या कॅमेऱ्यां वरवीं शार आनी मार्केटांतल्या हालचालींची टेळणीची जापसालदारकी येरादारी पुलीस आनी म्हापशें पुलिशे कडेन पालिका मंडळान दिल्ली.
गांधी चौक, कदंब बसस्टॅणअडाच्या दोनूय प्रवेश दारांचेर, ब्रागांधा हॉटेला मुखार, हुतात्मा चौक, सिंडिकेट बँके मुखार, टॅक्सीस्टॅण्डा लागसार, गोंय- मुंबय आंतरराज्य बसस्टॅण्ड, भौशीक बांदकाम खात्याच्या कार्यालया मुखार अश्या आठ सुवातांचेर हे सीसीटीव्ही कॅमेरे लायिल्ले.
मार्केटांतले सीसीटीव्ही कॅमेरे 2019 सावन जाल्यार शारांतले कॅमेरे सप्टेंबर 2021 सावन बंद आसात. हे बंद आशिल्ले कॅमेरे दुरुस्त करपाची विनवणी म्हापशें पुलिसांनी पालिके कडेन वेळावेळार केल्ली. हे संबंदांत पुलिसांनी वेळावेलार पालिके कडेन ह्या पत्रांची दखल घेवंक ना. सध्या कांय कडेन वीज खांब्याचेर आशिल्ले हे कॅमेरे सोबेच्यो वस्तू जाल्यात.
सीसीटीव्ही दुरुस्ती आनी देखभाल करपाची जापसालदारकी पालिकेन आपल्या अभियांत्रिकी विभागाक दिल्या. पूण ह्या विभागान तशेंच पालिका मंडळान बंद पडिल्ले कॅमेरे दुरुस्त करपाक कसलीच रुची दाखोवंक ना. ते भायर शारांत येरादारी सिग्नल यंत्रणा येवजण चालीक लायल्या, पूण ह्या सिग्नल यंत्रणेचेर सीसीटीव्ही कॅमेरे मात बसोवंक नात.
मजगतीं, जून 2021 त जीएमसींतल्या एका निकत्याच जल्माक आयिल्ल्या भुरग्याक फारावपाचो प्रकार घडिल्लो. त्या भुरग्याक घेवन दुबावीत बायल म्हापश्यां देंविल्ली. मात शारांतले सीसीटीव्ही कॅमेरे बंद आशिल्ल्यान खाजगी आस्थापनांच्या सीसीटीव्ही फुटेजीच्या आदारान पुलिसांक सोद घेवचो पडिल्लो. ते उपरांत ऑगस्ट 2021 त बाजारांतल्या भांगराच्या वस्तींच्या दुकानांत चोरी जाल्ली. चोरी आनी हेर गुन्यांवकारी प्रकारांचेर आळाबंद घालचे खातीर तेन्नाच्या पालिका मंडळान शारांत हे सीसीटीव्ही कॅमेरे लायिल्ले, पूण कॅमेऱ्यांचे दुरुस्ती कडेन सध्याच्या पालिका मंडळान आडनदर केल्ल्यान पालिकीचें हें उदिश्ट फुकट गेलां. मजगतीं, 2022 त पालिका मंडळान शारांतल्या 28 म्हत्वांच्या सुवातांचेर सीसीटीव्ही लावपाची येवजण आंखिल्ली. 25 लाख रुपया खर्चाचो हो प्रकल्प 15 व्या वित्त आयोगाच्या निधी वरवीं चालीक लावपाक नगरविकास खात्यान मान्यताय दिल्ली. मात अजून ही येवजण चालीक लागूंक ना.
म्हापशें शारांत खासदार निधींतल्यान सीसीटीव्ही कॅमेऱ्यांचे जाळें उबारपाच्या केंद्रीय मंत्री श्रीपाद नायक हांच्या प्रस्तावाक पालिका मंडळ आनी अधिकाऱ्यांनी मान्यताय दिल्ली. एप्रील 2025 त 1 कोटी रुपया खर्च करून पालिका वाठारांतल्या सगल्या 20 प्रभागांतल्या 83 सुवातांचेर हे कॅमेरे लावपाचें थारायिल्लें. मात पाटल्या पांच म्हयन्यां उपरांत लेगीत ह्या प्रकल्पाक चालना मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
