भांगरभूंय | प्रतिनिधी
पणजी : पाटो पणजे फुटपाथार पार्क केल्ल्या दुचाकी आड मोहीम हातांत घेवन येरादारी खात्यान कायदो मोडप्यांक करप्यांक तालांव दिलो. फुटपाथाचेर अतिक्रमण करून चलप्यांक त्रास जाता हे गोवा कॅन हे एनजीओन केल्ले कागाळींची दखल घेवन येरादारी खात्यान ही कारवाय केल्या.
पाट्यार पार्किंगेचे बारा बिरेस्तार आनी तेरा शुक्रार जाल्यात. सुवात नाशिल्ल्यान फक्त मोटारींकूच न्हय जाल्यार दुचाकींक सुवात मेळप कुस्तार जालां. दुसरो उपाय नाशिल्ल्यान कामाच्या वेळार लोक आपल्यो दुचाकी फुटपाथाचेर पार्क करतात. हे खातीर फुटपाथार चलपी लोकांक आडमेळी जातात.
गोवा कॅनान हे विशीं पणजे शारांत अतिक्रमण मुक्त फुटपाथ चलप्यांचो हक्क ही मोहीम सुरू केल्ली आनी हे मोहिमेची येरादारी खात्यान दखल घेतली. बुधवारा येरादारी खात्याचे सहाय्यक संचालकाच्या पंगडान फुटपाथाचेर पार्क केल्ल्या दुचाकींचेर कारवाय करून नेम मोडिल्ल्या कारणान 41 जाणांक तालांव दिले. पाटो पणजी गॅरा इमारती मुखार पार्क केल्ल्या दुचाकींक हे तालांव दिल्यात. पणजे फुटपाथाचेर विक्रेते आनी दुचाकींनी अतिक्रमण केलां. हाका लागून जाण्टे, भुरगीं आनी दिव्यांगांक त्रास सोंसचे पडटात. गोंयांत आतां जावपी पर्पल फेस्ट आनी इफ्फी ह्या व्हड कार्यावळींचे फाटभुंयेर ह्या लोकांक जावपी अडचणीचेर सरकारान खासा लक्ष दिवचें, अशी मागणी गोवा कॅनचे समन्वयक रोलन्ड मार्टीन्स हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
