भांगरभूंय | प्रतिनिधी
दोना पावला कांय म्हयन्यां पयलीं एका उद्देगपतीच्या बंगल्यार दरोडो पडिल्लो. नेमको तसलोच प्रकार म्हापश्यां गणेशपुरींतल्या दोतोरा बाबतींत घडलो. सात सशस्त्र दरोडेखोरांनी काल फांतोडेर 50 लाखां परस चड मोलाचो ऐवज लुटून व्हेलो. आतां पुलिसांनी हो प्रकार गंभीरपणान घेवन, खर तपास करपाक जाय. दोना पावलाच्या प्रकरणांत मुखार कांयच जालें ना. तशें परत जावचें न्हय. दोनूय प्रकरणांतली ‘गुन्यांव शैली’ एकेच सारकी आसा. म्हणटकच दरोडेखोरूय घडये तेच आसपाक शकतात. जाणें कोणें हें केलां, ते संबंदीत कुटुंबाचे वळखीचे वा तांगेर कामाक आयिल्ले आसूंक शकतात. तशेंच तांकां कोण येतात, वतात, घरांत खंय कितें दवरलां, ताची खबर आसपाक शकता. म्हापशेंच्या प्रकरणांत अमक्याच जनेलाचे वारांव कापप, भितर सरून खिणा भितर मुखेल दार उक्तें करप… हाचे वयल्यान दरोडेखोरांनी पयलीं घराची रेकी केल्या आसतली. दुबाव न्हयकारपाक जावचो ना.
कुटुंबांतले एके दोतोर बायलेन दिल्ले म्हायती प्रमाण, ही आंगार कांटो हाडपी घडणूक फांतोडेर 3 ते 5 मजगतीं घडली. ग्रील कापून चोर भितर सरले. त्या वेळार दोतोराची आवय सदचे भशेन फांतोडेर च्या करताली. तिका सुरो दाखोवन थंयच बांदून दवरली. मागीर दोतोराक, तांचे घरकान्नीक, चलयेक उठोवन तांचे मोबायल फोन काडून घेतले. दोतोराक मारपेट करून बांदलो. हेरांक कुडींत बंद केलीं. चलये कडल्यान पयलीं कपाटाच्यो चावयो घेतल्यो. सगल्यांच्यो वस्ती घेतल्यो. पूण तांकां आनीक पयशे जाय आशिल्ले. फुडलो धोको वळखून जाण्टे आवयन आपले कडले 10 लाख तांकां दिले. ते घेवन दरोडेखोर दोतोराचीच मोटार घेवन पळून गेले. गाडी काल मेरशे जंक्शनाचेर दवरिल्ली मेळ्ळी. हे चोर उत्तर भारतांतली हिंदी उलयताले खंय. घडये ती भोजपुरी आसतली. ते पळून गेल्यात काय लिपल्यात, तें तपासा उपरांत भायर सरचें. महासंचालका पसून उपनिरिक्षका मेरेन सगल्यांनी घडणूक थळाक भेट दिल्या. मुख्यमंत्री पसून थंय वचून आयल्यात. दरोडेखोर चड करून दुसऱ्या राज्यांतले आसतले. तांकां धरपाक कर्नाटक आनी महाराष्ट्रांत पुलीस धाडल्यात. तांकां बेगीन अटक जातली अशी आशा तांणी उक्तायल्या. गणेशपुरीचें ‘दोना पावला’ जावचें न्हय, इतलेंच मागणें.
दरोडेखोर सशस्त्र आशिल्ले. तांणी कोणाक गंभीर दुखापत करूंक ना, हेंच समाधान. तांचें लक्ष्य फक्त पयसो, वस्तींचेर आशिल्लें. दोना पावलाय अशेंच जाल्लें. ह्या दरोड्याचो परतून नव्यान तपास जावपाक जाय. दरोडे, चोरयो आडावप पुलीस, नागरीक आनी स्वराज्य संस्थां मदीं समन्वय आसप गरजेचें. शक्य आसा तांणी सीसीटीव्ही कॅमेरे, मोशन डिटेक्टर, अलार्म बसोवंक जाय. भायली एक तरी लायट रातची पेटत दवरची. चोर चड करून रातचे अडेज ते साडेचार मेरेन सक्रीय आसतात. सगल्यांनी सोशल मिडियाचेर प्रवास, सहल, संपत्तीची म्हायती घालप टाळपाक जाय. घरांत कोण आसता, कोण कामाक वता, असली म्हायती कोणाकूच दिवंक जायना.
सगल्यांनी शेजाऱ्यां कडेन बरे संबंद दवरल्यार ते एकमेकांची जतनाय घेवपाक शकतात. नेबरहूड वाॅच सारके उपक्रम चालीक लावंक मेळटात. आयज घरकामाक गोंयकार मेळप कुस्तार जालां. म्हणटकच कोणाक दवरतात ताची फाटभूंय तपासपाक जाय. रातची सगलेच कडेन पुलीस गस्त जाय. कारण आतां रातभर लोक भोंवतात. थोडे मध्यानरातीं मेरेन भायर चकाटां मारीत बसतात, इस्पिकांनी खेळटात. थोडे क्रिकेट, बॅडमिंटनाच्यो सर्ती खेळपाक उसरां मेरेन घरा भायर आसतात. तांकां शिटकावणी दिवन घरा धाडप पुलिसांचें काम. कोणाचो दुबाव आयल्यार ताची चवकशी जावची. ड्रोन, फेस रिकाॅग्निशन, नंबर प्लेट स्कॅनींग आसल्यार बरें.
गुन्यांव सोंपोवप ही समाजाची सामुहीक जापसालदारकी. हातूंत पुलिसूय आयलेच. चलात तर, जागृत रावुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
