भांगरभूंय | प्रतिनिधी
मडगांव: मुंगूल गँगवॉर प्रकरणांत फातोड्डें पुलिसांनी अटक केल्ल्या 23 दुबावितांक न्यायालयीन कोठयेंत 12 दिसांची वाड केल्या. दुबावीत अमोघ नायक, व्हॅली डिकॉस्टा आनी प्रकाश करबार हे पुलीस कोठयेंत आसात. दोगां दुबावितांक आतां मेरेन जामीन मेळ्ळा.
मुंगलार शगून हॉटेला कुशीक 12 ऑगस्ट दिसा गाडी आडवन तरसाद, कोयतो, सोडाच्यो बाटल्यो हांचो वापर करून दुबावितांनी फारपेट केल्लो. गुन्यांवांत वर्चस्व दाखोवपा खातीर हो हल्लो जाल्लो आनी गँगवॉरांत दुबावीत वॉल्टर गँगाचे रफीक ताशान (24) आनी युवकेश सिंग बदैला (20) हे गंभीर जखमी जाल्ले. दक्षीण गोंय पुलीस अधिक्षक टिकम सिंग वर्मा हांच्या फुडारपणा खाला आतां मेरेन 28 जाणांक अटक केल्या.
अटक केल्ल्या दुबावितां मदीं कार्व्हालो, शाहरुख शेख (रा. दवर्ली), रसूल शेख (रा. मडगांव), मोहम्मद अली, वासू कुमार, सूरज माझी, मलीक शेख, गौरांग कोरगांवकार (24), सुनील बिलावर (20, रा. घोगळ), जॉयस्टन फर्नांडीस (20, नेरुल), इम्रान बेपारी (38, रा. सांता क्रुझ), अक्षय तलवार (22, रा. ताळसाझर), अविनाश गुंजीकर (31, रा. नावेली), परशुराम राठोड (32, रा. बेळगांव), दीपक कट्टीमणी (47, रा. आकें बायश), अमर कुलाल, ताहीर, सलीम, महेंद्र नायक (21, रा. चिंबल), लुकआऊट नोटीस जारी केल्लो राहुल तलवार आनी अमोघ नायक हांचो वांगडी मंदार प्रभू गांवकार (बोरी) आनी सूरज नायक बोरकार, राजेश हेलमा, राजस्थान हांगा पंगड धाडून बिश्नोई गँगा कडेन संबंद आशिल्ल्या आनी आर्माची पुरवण केल्ल्याचो दुबाव आशिल्लो ओमसा हाका अटक केल्या. उपरांत शरण आयिल्ले दुबावीत अमोघ नायक, व्हॅली डिकॉस्टा, प्रकाश करबार हांकां अटक केली. ह्या तिनूय दुबावितांक चार दिसांची पुलीस कोठी दिल्या.
दुबावीत दीपक कट्टिमणी आनी परशुराम राठोड हांकां सशर्त जामीन मेळ्ळा. जाल्यार न्यायालयीन कोठी सोंपिल्ल्या 23 दुबावितांक सोमारा न्यायालयांत हजर करतकूच न्यायालयान कोठयेंत आनीक 12 दिसांची वाड केल्या. ताका लागून हे दुबावीत 18 ऑक्टोबर मेरेन न्यायालयीन कोठयेंत आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
