भांगरभूंय | प्रतिनिधी
बायलेच्या कागाळी उपरांत घोवा आड गुन्यांव नोंद
मडगांव: वार्का चर्चीचे फाटले वटेन रावपी विनंती कोलकार हांच्या घरा भायर दवरिल्ल्यो दोन दुचाकी उज्यांत लासून गोबर जाल्ल्यो. विनंती कोलकार हांचे कागाळी उपरांत कोलवा पुलिसांनी घोव दामोदर कोलकार हाचे आड गुन्यांव नोंद केला. दुचाकी लासून उडोवपाचो प्रकार कुटुंबीक वादांतल्यान जाल्ल्याचें मुखार आयलां.
वार्का चर्चीचे फाटले वटेन रावपी विनंती दामोदर कोलकार हांच्या दोन दुचाकींक आयतारा फांतोडेर उजो लागिल्लो. सुमार पावणेचार वरांच्या सुमाराक घरा भायर पार्क केल्ले अॅक्टिव्हा दुचाकी सयत ताचे कुशीक आशिल्ली टीव्हीएस एनटॉर्क हे दुचाकीकूय उजो लागलो. मडगांव उजो पालोवपी दळाचे जवान पावचे पयलींच थळाव्यांनी उज्याचेर नियंत्रण हाडलें.
दोन गाडयो लाशिल्ल्यान 2.20 लाख रुपयांचें लुकसाण जालां. हातूंतली एक दुचाकी विनंती कोलकार हांची जाल्यार दुसरी तांचे चलयेची आशिल्ली. हे घडणुके उपरांत विनंती कोलकार हांणी कोलवें पुलिशेंत कागाळ नोंद केल्या. ते प्रमाण दामोदर कोलकार हाणें दुचाकींक उजो लायिल्लो आसून ताणें धमकीय दिल्ल्याचें नमूद केलां.
हे कागाळी प्रमाण कोलवें पुलिसांनी धमकी दिवपा सयत मालमत्तेक उजो लावपाच्या प्रकरणांत दामोदर कोलकार हाचे आड गुन्यांव नोंद केला. ह्या प्रकरणांत हवालदार समीर मराठे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
