भांगरभूंय | प्रतिनिधी
वाहन काडलें ना जाल्यार जातलें जप्त आनी पावणी
मडगांव: रस्त्या कुशीक उब्यो करून दवरिल्ल्या बेवारशी वाहनांचे समस्येक लागून येरादारीक आडखळ निर्माण जायत आसा. हे खातीर फातोड्डें आनी मडगांव शार येरादारी पुलिसांनी जिल्होधिकाऱ्यांक अहवाल सादर केल्लो. ते प्रमाण आतां मडगांव आनी फातोड्डें वाठारांतल्यो 21 गाडयो काडपाचो आदेश जारी केला. स म्हयन्या भितर गाडयेच्या धनयान वाहन काडलें ता जाल्यार तें जप्त करून ताची पावणी करतले.
दक्षीग गोंय जिल्होधिकारी एग्ना क्लिटस हांणी बेवारशी वाहनांच्या समस्येचो नियाळ घेतिल्लो. रस्त्या कुशीक खूब तेंपा सावन गाडयो उब्यो करून दवरिल्ल्यान येरादारीक आडखळ निर्माण जाताली. तशेंच मॉन्सुनाचे फाटभुंयेर धामीच्या दुयेंसाची शक्यताय वाडिल्ली. ह्या कारणा खातीर बेवारशी गाडयो काडपा खातीर कारवायेचे आदेश जारी केल्यात, मडगांव येरादारी पुलिसांनी सादर केल्ल्या अहवालांत हावसींग सोसायटी, हॉटेल आनी रेस्टॉरंण्ट, हॉस्पिटल, बँकांचे कुशीक बेवारशी आनी कावलांतलीं वाहनां उबीं केल्यांत. जाल्यार फातोड्डें येरादारी पुलिसांनी सादर केल्ल्या अहवालांत गॅरेज, हॉस्पिटल, हॉल, पेत्रोलपंपा कुशीक वाहनां बेवारस स्थितींत आशिल्ल्याचें नदरेक हाडून दिल्लें.
दक्षीण गोंय जिल्होधिकाऱ्यांनी येरादारीक आडखळ करपी आनी अपघाताक कारण थारूंक शकतल्या ह्या वाहनांचेर कारवायेचे आदेश दिले. ह्या वाहनांनी उदक सांचून उरल्यार जळारां वाडून धामीचें दुयेंस पातळपाची शक्यताय आशिल्ल्यान ह्याे गाडयो कुशीक काडप गरजेचें आसा. ताका लागून जिल्होधिकाऱ्यांनी एक ऑक्टोबरा सावन स म्हयन्यां भितर सदर वाहन चालकां कडल्यान वाहनां कुशीक काडलीं नात जाल्यार सरकार वाहनां जप्त करतलें. ताचे उपरांत त्या वाहनांचेर दावो करूंक मेळचो ना. त्या वाहनांची जाहीर पावणी करून त्यो कावलांत काडटले अशें म्हणलां.
हे विशींची वळेरी उपजिल्होधिकारी कचेरेंत लायल्या. हे वळेरेंत जांचीं वाहनां आसात तांणी उपजिल्होधिकारी कचेरेंत कागादपत्रां सादर करचीं अशेंय सांगलां. ह्याच वर्सा एप्रील म्हयन्यांत वास्को आनी मडगांव शारांतल्या येरादारी पुलिसांनी जिल्होधिकाऱ्यांक अहवाल सादर केल्लो. ते प्रमाण आतां मडगांवां 55 आनी वास्को 60 बेवारशी गाडयो कुशीक काडपाचो आदेश जारी केल्लो. ताचे उपरांत परतून आतां बेवारस वाहनांचेर कारवाय करपा खातीर घोशणापत्र जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
