भांगरभूंय | प्रतिनिधी
पणजी : गोंयांत रस्ते बांदकामांत व्हडा प्रमाणांत भ्रश्टाचार सुरू आसा. दर वर्सा हजारांनी कोटी रुपया खर्च करून रस्ते बांदतात. मात फकत तीन म्हयन्यानीच नव्या रस्त्यांची वाट लागता. रस्त्यांचे खर्च केल्ले पयशे खंय वतात हाची जाप मुख्यमंत्र्यांनी दिवची अशी मागणी आम आदमी पक्षाचे राष्ट्रीय संयोजक अरविंद केजरीवाल हांणी केली. सोमारा तांणी पणजे माध्यामां कडेन संवाद सादलो. ह्या वेळार प्रदेश संयोजक अमित पालेकार, आमदार व्हेंजी व्हिएगस आनी हेर अधिकारी हजर आशिल्ले.
केजरीवाल हांणी, फाटल्या तीन दिसां सावन हांव गोंयांत भोंवतां. हांव सांता क्रुझ ते म्हापशें, सांता क्रुझ ते मयां असो प्रवास केले उपरांत समजलें, हांगच्या रस्त्यांची कितें बाबत अवस्था जाल्या ती. सध्या हांगच्या रस्त्यांचेर फोंडकुलां काय फोंडकुलांनी रस्ते अशी परिस्थीत जाल्या. इबाडिल्ल्या रस्त्यांक लागून थळाव्यां वांगडा पर्यटकांकूय त्रास जातात. पर्यटना खातीर देशांत गोंयची बरी प्रतिमा आसा. विदेशी पर्यटक दिल्ली, आग्रा आनी गोंयांत येतात. मात हांगच्या इबाडिल्ल्या रस्त्यांक लागून गोंयची प्रतिमा इबाडत आसा.
सध्या गोंयांत सरकारा आड कोणूय कितेंय उलोवपाक गेल्यार तांची तोंडां बंद करतात. धमकी दिवप, मारपेट करप, अश्यो गजाली जातात. आपाच्या कार्यकर्त्यांकूय धमकी दिली. मात आमी कोणाकूच भियेनात. आमचे भाजपचे बुराक मोहिमे वरवीं राज्यभरच्या एक लाखां परस चड लोकांनी बर्या रस्त्यांची मागणी केल्या. हीं कागदपत्रां मुख्यमंत्र्यां मेरेन पावयतले.
राज्यांतली जनता इतल्या व्हड प्रमाणांत मागणी केल्ल्यान मुख्यमंत्री बरे रस्ते करतले, अशी आमची अपेक्षा आसा, अशें केजरीवाल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
