भांगरभूंय | प्रतिनिधी
सर्तीच्या परिक्षेक बसप, ताची तयारी करप हें चडशे विद्यार्थी आतां करपाक लागल्यात. ताचे फायदे सध्याच्या काळांत चड आसात. हाचे कारण तुमकां नोकरी मेळोवपाक कोणाचीच वळख सांगची पडची ना. वशिलो लावचो पडचोना. तुमी पयशेकार आसपाची गरज ना. परिक्षेक बरे गुण मेळ्ळे काय अधिकाऱ्याची नोकरी, भरपूर पगार, पेन्शन दिवपी नोकरी मेळटली. पूण ताका बरीच आदी तयारी करची पडटली. चालू घडामोडींचेर तातूंत कांय प्रस्न आसतात. सद्दां दिसाळीं वाचल्यार तुमकां हाची म्हायती मेळटली. ताका लागून तुमी एक थळावें आनी एक राष्ट्रीय दिसाळें विकत घेवपाक जाय. आतां तर डिजिटल काॅपी मेळटात. ताका लागून तुमी गोंय, देशूच न्हय, तर पुराय संवसारांतलीं दिसाळीं वाचपाक शकतात. https://www.sumanasa.com/ ही वेबसायट पळोवची. जे संस्थेची तुमी परिक्षा दितले, ताची, पोस्टाच्या विशयाची म्हायती वाच्ची. तांच्यो वेबसायटी आसतात. ताचेर ही म्हायती मेळटा.
तुमी वेबसायटी देशी भाशेंत पळोवपाक शकतात, तशीं इंग्लिशींतूय वाचपाक शकतात. संविधानाची म्हायती, राज्या विशीं वाचपाक शकतात. गोंय सरकाराचो लोकसेवा आयोग (जीपीएससी, https:// gpsc.goa.gov.in/advertisements/) आसात. ताचे अध्यक्ष आसात, डॉ. उदयसिंह श्रीकांत राव राणे. ईडीसीचें पणजे कार्यालय आस. तांचें अर्ज तुमकां आॅनलायन भरपाक मेळटा. सरावा खातीर पसून पेपर डावनलोड करूंक मेळटा. खंयचीय परिक्षा आसूं, तुमकां ताजे घडामोडीचेर प्रस्न येतलेच. इंग्लीश उलोवपाक, बरोवपाक, वाचूंक येवंक जाय. आतां अॅप आशिल्ल्यान सगलें सोंपें जालां. क्लिक केलें काय सगलें हाजीर. आमच्यो सगल्यो माध्यमीक शाळा, ह्यो गोंय मंडळा लागीं नोंद आसात. बँको घेतात, तसली सर्तीची परिक्षा मंडळ घेना. ताका लागून आमकां ह्यो परिक्षा जड वतात. कांय भुरग्यांक तर ते विशीं कांयच खबर आसना. ताकाच लागून वेबसायटीर दिल्ले पेपर डावनलोड करून तुमी सराव करपाक जाय.
आतां ह्यो परिक्षा वेळाचेर जाता. तांचो निकाल पसून थारिल्ले प्रमाण जाता. हे परिक्षेक कसलोच स्कॅम जायना. त्यो सगल्यांक न्याय दिता. सगल्या जाती, धर्माच्या विद्यार्थ्यांक तीं सांबाळून घेता. तुमी परिक्षेचें स्वरुप जाणून घेवपाक जाय. ताका आमी पॅटर्न म्हणटात. खंयच्या प्रस्नाक कितले गूण दितात, हाची तुमकां कल्पना आसत जाल्यार अभ्यास करप सोंपें जाता. लश्कराच्या परिक्षा आसल्यार तुमकां देशसेवा करपाची संद मेळटा. ही परिक्षा कठीण आसली तरी ताची तयारी तुमी बेगीन करपाक जाय.
जायत्या सर्तीच्या परिक्षांचें आॅनलायन वर्ग लेगीत आसतात. खेरीत तांची वेबसायटूय आसता. देखून बारीक सारीक प्रस्न तकलेंत येवपाची गरज ना. मार्गदर्शन मात जरुर घेयात. हे परिक्षेचो जाका ताजो अणभव आसा, ताका विचारीत जाल्यार चड बरे. कांय वेळार नेम बदलतात. मार्गदर्शन वर्गांत तुमकां सगले मार्गदर्शन मेळटा. पूण वर्गाक वचूंक शकनात, तांचे खातीर बेतोडचे एके खाजगी संस्थेन मार्गदर्शन वर्ग सुरु केला तें सांगीन दिसता. तशें जर सगल्या गांवांनी सुरू जायत जाल्यार गांवगिऱ्या वाठारांतल्या विद्यार्थ्यांक बऱ्याक पडटलें.
सध्या नागरी सेवेचें मार्गदर्शन गोंय विद्यापीठान सुरू केलां. तें ह्या म्हयन्यांतल्यान सुरू जातलें. आतां आॅनलायन लेगीत वर्गाक वचपाक मेळटा. जाका वचूंक मेळना, तांचे खातीर हें बरें. सर्तीच्या परिक्षे खातीर तुमी गणित आनी इंग्लिशीचो, चालू घडामोडीचो अभ्यास करून दवरचो. ताचो लाव जातलोच. गोंय सरकाराचे नोकरे खातीर गोवा पब्लिक सेवा आयोगाचें तर गोंय विद्यापीठाचें तुमकां नागरी सेवे खातीर मार्गदर्शन मेळटा. सर्तीच्या परिक्षेची तयारी तुमकांच करपाक जाय. मार्गदर्शन कोण दिता, हें शिक्षकांक, आदल्या उमेदवारांक विचारून सोदून काढात. तुमकां परबीं.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
