भांगरभूंय | प्रतिनिधी
केपें : श्रमधाम खाला गरिबांक घर बांदून दिवपाचो खेळां मंत्री रमेश तवडकार हांणी निश्चेव केला. हाचे खाला कोठंबी केप्यां 71 वें घर बांदपाक सुरवात केल्या. ताचो बुन्यादी फातर तवडकार हांचे हस्तुकीं शुक्रारा 3 ऑक्टोबराक बसयलो. ह्या वेळार जिल्हो पंचायत उपाध्यक्ष सिद्धार्थ गांवस देसाय, किस्तोदिओ फर्नांडीस, सरपंच कविता गांवस, उपनगराध्यक्ष अमोल काणेकार, विश्वास सावंत, शिल्पा प्रभुदेसाय आनी हेर मानेस्त हाजीर आशिल्ले. ह्या घरा खातीर थळावे जिल्हो पंचायत वांगडी सिद्धार्थ गांवस देसाय हांणी फुडाकार घेतला. तशेंच खूब जाणांनी मजतीचो हात फुडें केला.
100 घरां बांदपाचो निश्चेव केला. हें घर 25 दिसांत बांदून पुराय करतले, अशें तवडकार हांणी सांगलें.
आयज संवसार बदलता आनी तातींत गांवांतलें गांवपण, मनीसपण शेणत चल्लां. गांवांत दुसऱ्याक मजत करपाक कोण मुखार सरना, हाका लागून गांवपण इल्ले इल्लें उणें जाता आनी मनीसपण लेगीत शेणटां. गांवांत 2 ते 3 टक्केच लोक गरीब आसात, पूण तांचे कडेन कोण पळय लेगीत ना. राजकारणी लेगीत फक्त वेंचणुके वेळारूच येतात. हें खत पुसपा खातीर कसलोच सुवार्थ बाळगिनासतना वावर करपाक राजकारण्यांनी मुखार येवचें, अशें तवडकार हांणी सांगलें. आतां मेरेन कार्यकर्त्यांच्या बळार 70 घरां बांदल्यांत. केन्नाच जात धर्माचो विचार करिनासतना मनीसपणाच्या नात्यान मजत केल्या, अशें तवडकार हांणी सांगलें. तशेंच उण्यांत उणो एक रुपया आनी एक दीस श्रमदान करचें, असोय तांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
