भांगरभूंय | प्रतिनिधी
पूण 90 च्या दशकांत एक काळ असो आसलो की शक्ती कपूर आनी कादर खान जोडी सिनेमा हिट करपाक पुरो आशिल्ली.
फिरोज खान, धर्मेंद्र, सुनील दत्त, विनोद खन्ना सारकिल्ल्या नायकां वांगडा आनी तांच्या पुतां वांगडाय खलनायक म्हणून काम करपी आपूण एकसुरो अभिनेतो अशें शक्ती सांगता. मजगतीं, सत्ते पे सत्ता (1982) ह्या चित्रपटांत ताणें विनोदी भुमिका केल्ली. 1980 आनी 1990 च्या दशकांत खलनायक म्हणून ‘शक्ती कपूर’ हें नांव घराघरांत पावलें. असरानी आनी कादर खाना वांगडा ताणें 100 वयर चित्रपटांनी याद उरपी विनोदी आनी खलनायक अशीं पात्रां करून प्रेक्षकांच्या काळजांत सुवात मेळयली. तांगेले कांय सिनेमा सांगचे जाल्यार, हिम्मतवाला (1983), मवाली, घर एक मंदिर (1984) तोहफा (1984) मास्टरजी (1985) पाताल भैरवी (1985) गिरफ्तार (1985), धर्म अधिकारी (1986) सोन पे सुहागा (1988) चालबाज (1989) जैसी करनी वैसी भरनी (1989) बाप नंबरी बेटा दस नंबरी (1990) यारा दिलदारा (1991), बोल राधा बोल (1993) घरजमाई (1993) आँखे (1993) खुद्दार (1995), साजन चले ससुराल (1996) जुड़वा (1997) मैं खिलाड़ी तू अनाड़ी (1994) याराना (1995) नसीब (1997) हिरो नं. 1 (1997) जोडी नं. 1 (2001) अखियों से गोली मारे (2002). शक्तीक सतत खलनायकांची भुमिका करपाची संद मेळटाली. ताका टायपकास्ट जावपाची भिरांत आशिल्ली. उपरांत ताणें आपलो प्रकार बदलून विनोदांत नशीब आजमावपाचें थारायलें. ‘अंदाज अपना अपना’ सिनेमांत विनोदी गुंडा मास्टर गोगो आनी ‘राजा बाबू’ सिनेमांत विनोदी पूण हुशार नंदू हे भुमिकेन शक्तीक विनोदी कलाकार म्हणून प्रेक्षकांली विशेश पसंती मेळ्ळी. ‘राजाबाबूं’तले सिनेमांतले भुमिके खातीर ताका विनोदी अभिनेत्याचो फिल्मफेयर पुरस्कार फावो जालो. ताच्यो हेर कांय याद उरपी भुमिकां म्हणल्यार मंगल (सत्ते पे सत्ता)’, ‘जिमी थापा (हिरो)’, ‘इन्कलाब’ (कोया कोया अताची), ‘जग्गा (कर्मा), इन्स्पेक्टर भिंडे (इन्साफ), गूंगा (बोल राधा बोल), प्रसाद (बाप नंबरी बेटा दस नंबरी), बटुकनाथ (चालबाज), शक्ति दादा (अखियों से गोली मारे). ताच्या विनोदी आनी खलनायक भुमिकेंत ताचे कांय नामनेचे संवाद अशे आसात: ‘आऊ लोलीता!’, ‘मै नन्हा सा, प्यारा सा, छोटा सा बच्चा हूँ!’ क्राइम मास्टर गोगो नाम है मेरा, आखें निकाल के गोटियां से खेलता हूँ!’, ‘नंदू, सब का बंधू. डेव्हिड धवन, प्रियदर्शन ह्या सारक्या जायत्या चित्रपट निर्मात्यां कडेन शक्तीचे खूब बरे संबंद आसात, तांचे खातीर ताणें हंगामा, हलचल, चुप चुप के, मालामाल विकली, भागम भाग सारकिलीं हिट फिल्मां दिल्यात.
एक काळ आसलो की नायक- नायिका जोडी सिनेमा खातीर म्हत्वाचें मानताले. पूण 90 च्या दशकांत एक काळ असो आसलो की शक्ती कपूर आनी कादर खान जोडी सिनेमा हिट करपाक पुरो आशिल्ली. पूण एक काळ आयलो की ताका दिसलें की ताणें विनोदी भुमिका सोडची. कारण, खलनायक म्हूण तो हीट आशिल्लो. खरें म्हणल्यार ‘मवाली’ ह्या सिनेमाच्या चित्रीकरणा वेळार ताणें अरुणा इराणी, कादर खान, जीतेंद्र हांचे वांगडा काम करतना पयल्या दिसा अरुणा इराणीन पयल्या शॉटा वेळार पोल्यार थापट मारलें. दुसऱ्या शॉटांत जितेंद्रान थापट मारलें आनी तिसरे खेप कादर खानान फाटोफाट तीन थापटां. शक्ती कपूर अस्वस्थ जालो. तो मास्टर वीरू देवगण (अजय देवगणाचो बापूय) कडेन गेलो आनी म्हणपाक लागलो, “हांव एक टॉप- क्लास व्हीलन, पूण हांगा म्हाका थापटावपाक लागल्यात. म्हाका ह्या सिनेमांत रोल करपाची इत्सा ना.’ अशें ताणें सांगलें. पूण ताका विरून हो एक बऱ्यांतलो बरो तेलुगू फिल्माचो रिमेक आसा आनी हें विनोदी खलनायकाचें पात्र खूब बळिश्ट आसा अशें सांगलें. शक्तीन परतून येवन परफेक्ट शॉट दिलो. हो चित्रपट सुपरहिट जालो आनी ताच्या अभिनयाक प्रतिसाद मेळ्ळो. ह्या चित्रपटान कादर खान आनी शक्ती हांची यशस्वी जोडी लोकप्रीय जाली.
जेन्ना खलनायकांचो विशय येता तेन्ना शक्तीचें नांव मुखार आसता. वांगडाच फिल्म इंडस्ट्रींत जेन्ना लिंगीक प्रकरणाचो विशय येता तेन्नाय ताचें नांव फाटीं आसना. 2005 वर्सा एका स्टिंग ऑपरेशना मजगतीं शक्ती कास्टिंग काउचांत आडकल्लो ते वेळार, हिंदी सिनेमांत करिअर करपाक मजत करतां अशें उतर दिवन एके बायल पत्रकारा कडल्यान लिंगीक संबंदाची मागणी केल्ली असो आरोप जाल्लो. उपरांत पत्रकार परिशदेंत शक्तीन हें न्हयकारलें. ते बायल पत्रकारान गोड उलोवन आपल्याक हनी ट्रेपांत आडकयिल्लो अशें सांगलें. ‘बिग बॉस 5’ ह्या वादग्रस्त टिव्ही शोंत शक्तीन वांटो घेतिल्लो. पयल्या दोन सप्तकांत तो घरांतल्या लोकांचो कॅप्टन आशिल्लो, पूण चवथ्या सप्तकांत तो भायर सरलो. त्या वेळार ताचेर बिग बॉस सर्तकाच्या कानसुलार थापट मारपाचो आरोप आशिल्लो.
वैयक्तीक जिणेंत शक्तीचें लग्न अभिनेत्री पद्मिनी कोल्हापुरेची व्हडली भयण शिवांगी कडेन जालां. शिवांगी ताचे परस बारा वर्सांनी ल्हान. ते खातीर कोल्हापूरे कुटुंब ह्या लग्नाक विरोध करतालें. सदांच पडद्याचेर दोन मोगी मदीं खलनायक म्हणून दिसपी शक्ती कपूर आनी शिवांगीची मोगाची कथा तितलीच रोमँटिक आसा.
शिवांगी ही 80 च्या दशकांतली अभिनेत्री. तिणें 1980 वर्सा ‘किस्मत’ सिनेमांतल्यान कारकीर्द सुरू केली. मिथुन चक्रवर्ती आनी रंजीता हांचे वांगडा शक्ती कपूर आशिल्लो. सेटाचेर शक्ती आनी शिवांगीची पयलेच खेपे भेट जाली. हो सिनेमा तांचें नशीब बदलतलो हाची तांकां घडये कल्पना नाशिल्ली. ‘किस्मत’ चें शुटींग सुरू जाल्लें, पूण शक्ती आनी शिवांगीच्या दृश्यांचें शुटींग वेगवेगळ्या दिसां आसतालें. देखून दोगांयचेय सेटाचेर मेळप जायनाशिल्लें, कांय अडचणींक लागून शुटींगाचे तारखांचो गोंदळ जाल्ल्यान कळाव जावपाक लागलो. उपरांत शक्ती आनी शिवांगीची शुटींग तारीख एकाच दिसा दवरून शुटींग बेगीन पुराय करपाक लागले. एकामेकांक मेळप जालें. ही इश्टागत मोगांत रुपांतरीत जावपाक वेळ लागलो ना. एके वटेन ‘किस्मत’ हिट जालो, दुसरे वटेन नियतीनय शक्ती आनी शिवांगीची जोडी एकठांय हाडली. ह्या लग्नाक कोल्हापूरे परिवाराचो इतलो खर विरोध आशिल्लो की तांणी शिवांगीक घरांतले एके कुडींत बंद करुन दवरली, पूण शिवांगी थंयच्यान कशी तरी पळून गेली आनी 1982 वर्सा पिरायेच्या 18 वर्सां ती शक्ती कपूरा कडेन लग्न जाली.
आवय- बापायक इतली तिडक आयली की तांणी दोगांय कडेन उलोवप बंद केलें. लग्ना उपरांत शिवांगीन सिनेमा सोडलो. पिरायेच्या 19 व्या वर्सा शिवांगीन पूत सिद्धांताक जल्म दिलो तेन्ना तिची आवय हॉस्पिटलांत तिका मेळपाक गेल्ली. मागीर ल्हवू ल्हवू तांचे संबंद सुदारपाक लागले. उपरांत श्रद्धा ही चली जाली. सद्या श्रद्धाक हिंदी फिल्म मळार बरें नांव मेळ्ळां. शक्ती कपूर आयजूय काम करता. विनोदी आनी खलनायकी स्वरुपाचें.
————————————
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
