भांगरभूंय | प्रतिनिधी
मुख्यमंत्री : आमोण्यां कृत्रीम टफ आशिल्ल्या मैदानाचें उक्तावण
भांगरभूंय । प्रतिनिधी
दिवचल : आमोण्यां खूबशे तरणाटे फुटबॉल खेळटात. ह्या गांवांत नेमान मॅची जातात. ह्या खेळगड्यांक सुसज्ज मैदान मेळचें हे खातीर केल्ल्या यत्नांक निमाणें येस आयलें. हाचे मुखार हें मैदान आनी ताचे वयलें कृत्रीम टर्फ राखून दवरप, मैदानाची जतनाय घेवपाची जापसालदारकी पंचायतीची आसा. ते खातीर पंचायतीचो निधी वापरी नासतना ह्या मैदानांतल्यानूच महसूल निर्मिती करात, असो उलो मुख्यमंत्री डॉ. प्रमोद सावंत हांणी मारलो.
आमोणेंच्या मैदानाचेर आमोण्या वेवसाय करपी सेसा कंपनी वतीन सुमार 1 कोटी रुपया खर्च करून कृत्रीम टर्फ घातलां. ह्या सुसज्ज मैदानाचें उक्तावण मुख्यमंत्री डॉ. सावंत हांचे हस्तुकीं केलें. ह्या वेळार माचयेर सेसा कंपनीचे सीईओ सप्तेश सरदेसाय, पद्मिनी फावंडेशनाची अध्यक्ष सुलक्षणा सावंत, आमोणेचे सरपंच सागर फडते, उपसरपंच गौरवी गांवस, पंच वसंत सिनारी, कृष्णा गांवस, दिया सावंत, वासुदेव घाडी, जिल्हो पंचायत वांगडी गोपाळ सुर्लकार, सांखळी युवा उत्सवाचे समन्वयक शाणू उसगांवकार, प्रतीक भगत, विरेंद्र एकावडे उपस्थीत आशिल्ले.
खेळतना तांत्रीक नदरेन प्रशिक्षण आनी मार्गदर्शन दिवचे खातीर हाचे मुखार सेसा कंपनी मजत करपाक तयार आसा. ही मजत घेवन गांवांतल्यान प्रशिक्षीत खेळगडे तयार करपाक दरेकल्यान भर दिवचो, अशें मुख्यमंत्र्यान सांगलें.
सरपंच सागर फडते हांणी सांगलें, गांवांत मैदान आशिल्लें, पूण ताचेर टर्फ नाशिल्ल्यान खेळगडे जखमी जाताले. ह्या मैदानाचे उदरगती खातीर मुख्यमंत्री डॉ. सावंत हांचे कडेन प्रस्ताव सादर केलो. ते उपरांत तांणी सेसा कंपनीच्या समाजीक जापसालदारकेंतल्यान ह्या मैदानाची उदरगत करपाक पावल उखल्लें आनी ह्या मैदानाची योग्य उदरगत जाली.
एक वर्स ह्या मैदानाची जतनाय कंत्राटदार घेतलो आनी ते उपरांत ताचो ताबो पंचायती कडेन दितलो. पंचायतीन ह्या मैदानाचेर दर्जेदार सर्ती आयोजीत करून, तशेंच अश्या सर्तीं खातीर मैदान भाड्यान दिवन महसूल उबो करचो. तातूंत साबार नव्यो नव्यो गजाली करपाक मेळटल्यो. हें मैदान गोंयांतलें एक मॉजेल मैदान करपाची संद आमोणें पंचायती कडेन आसा, अशें सप्तेश सरदेसाय हांणी सांगलें. मुख्यमंत्री डॉ.प्रमोद सावंत हांचे हस्तुकीं मैदानाचें उक्तावण केलें.रोहन घाडी हांणी सुत्रसंचालन केलें.
मुख्यमंत्र्यांची पेनल्टी शूट थारली निर्णायक
आमोणें मैदानाच्या उक्तावण सुवाळ्या उपरांत सांखळी युवा उत्सवाचे नदरेन सांखळी भाजप मंडळ आनी सांखळी भाजप युवा मोर्चा हांचे मदीं प्रदर्शनीय फुटबॉल मॅच जाली. हे मॅचींत मुख्यमंत्री डॉ. प्रमोद सावंत भाजप मंडळाच्या पंगडाचें फुडारपण करीत मैदानार देंवले. ही मॅच बरोबरींत सोंपले उपरांत टायब्रेकराचेर भाजप मंडळ पंगडान ही मॅच जिखली. मुख्यमंत्र्यान मारिल्ली पेनस्टी शूट निर्णायक थारली. हे मॅचींत मुख्यमंत्र्यान आपली तंदुरुस्तीची झलक दाखयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
