भांगरभूंय | प्रतिनिधी
संजय वालावलकार : सत्तरी म्हाला वतीन मनयलो दसरो
भांगरभूंय । प्रतिनिधी
वाळपय : राष्ट्रीय स्वयंसेवक संघाक (आरएसएस) दसऱ्याक 100 वर्सां पुराय जालीं. कांय मेजक्या संघचालकां पासून सुरू जाल्लो स्वयंसेवक आयज लाखांचे संख्येन देशभर तशेंच विदेशांत वावर करता. स्वयंसेवक हो निसुवार्थी आसता. तातूंत शिस्त सगल्यांत म्हत्वाची आसता. ताका कसलेंच राजकी पद लागना. तो राष्ट्रहिता खातीर निसुवार्थी भावनेन काम करता. हेच खातीर हो संघ आयज 100 वर्सांचो प्रवास करपाक शकलो, अशें मुखेल उलोवपी म्हूण संजय वालावलकार हांणी सांगलें.
आरएसएसाक 100 वर्सां पिराय जाल्ल्या निमतान वाळपयच्या इंदिराबाई काणेकार सभाघरांत सत्तरी म्हाल राष्ट्रीय स्वयंसेवक संघा वतीन दसरो उमेदीन मनयलो. ह्या सुवाळ्यांत वालावलकार उलयताले. कार्यावलीक मुखेल सोयरे म्हूण ओंकार प्रभू, सत्तरी म्हाल कार्यवाह नकुळ वेळुस्कार हाजीर आशिल्ले.
वालावलकार हांणी सांगलें, संघाची स्थापना 27 सप्टेंबर 1925 ह्या दिसा नागपूरांत डॉ. केशव बलीराम हेडगेवार हांणी विनायक दामोदर सावरकर हांचे विचारसरणीचेर आदारारून केल्ली. संघाचें ध्येय भारताक एकात्म, बळिश्ट आनी संस्कारीत राष्ट्र करपाचें आसा. आयज आरएसएस ही संवसारांतली सगल्यांत व्हड स्वयंसेवी संघटणा म्हूण वळखतात. ह्या शेंकड्याभरांतल्या प्रवासांत संघान समाजसेवा, शिक्षण, भलायकी, ग्रामविकास, स्वदेशी चळवळ, संस्कृती संवर्धन आनी तरणाटे- बायलांचें सक्षमीकरण अश्या साबार मळांचेर मोलाचें योगदान दिलां. आयज सगल्यांनी एकठांय येवपाची गरज आसा. राष्ट्रहिताक प्राधान्य दिवपाक जाय, अशें तांणी सांगलें.
ओंकार प्रभू हांणी सांगलें, राष्ट्रीय स्वयंसेवक संघाची स्थापना राष्ट्राक एकठांय करपाच्या हेतून जाली. आयज 100 वर्सां उपरांत लेगीत तीच भावना तिगून आसा. निसुवार्थ सेवा, समर्पण आनी राष्ट्राभिमान हाकाच लागून संघान 100 वर्सांचो प्रवास पुराय केला. धर्म आनी राष्ट्रीयता तिगोवन दवरप गरजेचें आसा. शक्ती परस मुल्यां आनी तत्वां सांबाळपाक जाय.
समाजांत वायट गजाली जायत आसतात. खूब जाण एकामेका मदीं फूट घालपाचें काम करतात. हाचे पसून सादूर रावपाची गरज आसा. अन्याया आड लडपाक जाय. आयच्या तरणाट्यांनी स्वयंसेवक संघांत वांटेकार जावन देशाच्या रक्षणा खातीर फुडाकार गेवचो. वायटाचेर बऱ्याचें जैत हीच तर दसऱ्याची मोख आसा, अशेंय प्रभू हांणी सांगलें.
कार्यावळीक 500 परस अदीक लोक हाजीर आशिल्ले. स्वयंसेवकांच्या संघटन संचलना सयत शस्त्रपुजा केली. डॉ. हेडगेवार, छत्रपती शिवाजी महाराज आनी भारतमाता हांच्या प्रतिमांक अभिवादन केलें. स्वयंसेवक चिन्मय गाडगीळ हांणी गीत सादर केलें. राष्ट्रीय झेंडो सन्मानान चडोवन तो कार्यावळ सोंपले उपरांत देंवयलो.
नकुळ वेळुस्कार हांणी प्रास्तावीक केलें आनी येवकार दिलो. राजाराम सांड्ये हांणी सुत्रसंचालन केलें आनी उपकार मानले. संघाच्या शती वर्सा निमतान घराघरांत जनजागृती, तशेंच विवीध समाजीक आनी सांस्कृतीक कार्यावळींचें आयोजन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
