भांगरभूंय | प्रतिनिधी
मडगांव: मुंगूलच्या गँगवॉर प्रकरणांत फातोड्डें पुलिसांनी अटक केल्ल्या दुबावीत मोहम्मद ताहीर खानाचो जामीन अर्ज न्यायालयान भायर मारला. गुन्यांवांत दुबाविताचो आसपाव आशिल्ल्याचें प्रथमदर्शनी पुरावे आशिल्ल्यान न्यायालयान हो निर्णय दिलो.
मुंगूलच्या गँगवॉर प्रकरणांत मारपेटा वांगडा फारपेटूय जाल्ली. ह्या प्रकरणांत पुलिसांनी आतां मेरेन 28 दुबावितांक अटक केल्या. दुबावीत मोहम्मद ताहीर खान हाणें जामीन मेळचो म्हूण दक्षीण गोंय जिल्लो सत्र न्यायालयांत अर्ज सादर केल्लो. दुबाविताच्या वकिलांनी, खान हांचेर ह्यान पयलीं कसलोच गुन्यांव नोंद ना. तांची तपासांत पुराय सहकार्य केलां, तो सध्या न्यायालय बंदखणींत आसा. ताचे कडेन चवकशी करपाची आनीक उरूंक नाशिल्ल्यान जामीन मंजूर करचो असो युक्तीवाद केलो.
पुलिसांनी न्यायालयाक सांगलें, दुबावीत मोहम्मद ताहीर खान हांणी गँगवॉर प्रकरणांतलो मुखेल दुबाविता खातीर भाड्याचे टॅक्सीची वेवस्था केल्ली. घडणुके उपरांत दुबावीत खान हो हेर दुबावितां वांगडा वेगवेगळ्या गाडयांनी कर्नाटकाक गेल्लो. गुन्यांवांत वापरिल्ली हत्यारांची येरादारी करपांत तांचो आसपाव आसा. कर्नाटकाच्या यारागट्टी हॉटेल आनी सदाशिवगडच्या लॉजचे सीसीटीव्ही फुटेजी वेल्यान स्पश्ट जाता, हॉटेलांत पावले उपरांत दुबावीत खान हो इम्रान बेपारी, अविनाश गुंजीकर, अक्षय तलवार, जॉयस्टन फर्नांडीस हांचे वांगडा रावतालो. कॉल रेकॉर्डवेल्यानूय ताचें हेर दुबावितां कडेन उलोवप जाल्ल्याचें स्पश्ट जाल्लें. गँगवॉर प्रकरण हो गंभीर गुन्यांव, कारचालकाच्या जबाबांतल्यान दुबावीत खान हाचो वांटो स्पश्ट जाता. ह्या प्रकरणांत 25 परस चड दुबावीत न्यायालयीन बंदखणींत आसा, तपास अधिकार्याक सगल्यांची चवकशी करपाक आनीक वेळ गरजेचो आसा.
दोनूय बाजू आयकून घेतले उपरांत न्यायालयान प्रथमदर्शनी पुराव्यांचो विचार केलो. सध्याच्या तपासाच्या टप्प्याचेर दुबावीत मोहम्मद ताहीर खान हाका जामीन मंजूर करप योग्य जावचें ना, असे नमूद करीत ताचो जामीन अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
