भांगरभूंय | प्रतिनिधी
पणजी: समाजीक कार्यकर्तो रामा काणकोणकार हांचेर जाल्ल्या हल्ल्याच्या निशेधान 19 सप्टेंबराक पणजे काडिल्लो मोर्चा बेकायदेशीर थारायत, पणजी पुलिसांनी विरोधी पक्षांतले मुखेल फुडारी आनी हेर सुमार 450 जाणांचेर गुन्यांव दाखल केलो. बेकायदेशीर जमाव करून, रस्ते आडावन जनतेक त्रास दिल्ल्याचो थपको ह्या फुडार्यांचेर दवरलो.
ह्या प्रकरणांत पुलीस निरीक्षक विजयकुमार चोडणकार हांणी कागाळ दाखल केल्या. कसलेच तरेची परवानगी घेनासतना पणजे बेकायदेशीरपणान एकठांय येवन मोर्चा काडलो, अशें पुलिसांचे कागाळींत म्हणलां.
ह्या बेकायदेशीर मोर्चा प्रकरणांत मुखेल राजकीय मनीस आनी समाजीक कार्यकर्त्यांचेर गुन्यांव नोंद केला. तातूंत विरोधी पक्ष फुडारी युरी आलेमाव, गोवा फॉरवर्ड पार्टीचे मुखेली विजय सरदेसाय, आपचे फुडारी अमित पालेकार, कॉंग्रेसीचे प्रदेशाध्यक्ष अमित पाटकार, आरजीचे प्रमुख मनोज परब, आमदार वीरेश बोरकार आनी व्हेंझी व्हिएगस हांचो आसपाव आसा. ताचे भायर, अंजली निंबाळकर, संजू नायक, गोविंद शिरोडकार, तशेंच आदले आमदार प्रसाद गांवकार, प्रकाश वेळीप, गिरीश चोडणकार हांचे सयत 450 जाणां आड गुन्यांव नोंद केला.
19 सप्टेंबराक पणजेच्या आझाद मैदानार काणकोणकार हांचेर हल्ल्याच्या निशेधान निदर्शनां सुरू जाल्लीं. हाचे उपरांत जमावान सरळ पुलीस मुख्यालयाक धपको दिलो आनी सरकारा आड नेटान घोशणा केल्ली. उपरांत आंदोलकांनी मुख्यमंत्री प्रमोद सावंत हांच्या आल्तिनोच्या घरा भायर गर्दी केली. तशेंच, हातुंतल्या कांय आंदोलकांनी भाजपाच्या कार्यालयांतूय जाणांचो यत्न केल्लो. मात, मोर्चा खातीर कसलीच अधिकृत परवानगी घेवंक नाशिल्ली, असो दावो करीत पुलिसांनी ही कायदेशीर कारवाय केल्या. ह्या प्रकरणांत फुडलो तपास सुरू आसा, पुलीसांनी सगल्या आरोपींक सहकार्य करपाचो उलो मारला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
