भांगरभूंय | प्रतिनिधी
पणजी : गोंय प्रदेश युवक कॉंग्रेसची वेंचणूक प्रक्रिया सुरू जाल्या. हाका लागून नवे कार्यकारिणी खातीर वेंचणूक प्रक्रिया सुरू जाल्या. फुडल्या दोन म्हयन्यांत निकाल लागतलो अशी म्हायती युवक कॉंग्रेसचे राष्ट्रीय सचीव स्वप्नील पाटील हांणी दिली. शेनवारा पणजे जाल्ले पत्रकार परिशदेंत ते उलयताले. ह्या वेळार भूपेंद्र सिंग राजपूत, महेश नादर आनी हेर पदाधिकारी हाजीर आशिल्ले.
पाटील हांणी सांगलें, युवा कॉंग्रेसच्यो वेंचणुको लोकशाय पद्धतीन घेतात. हाका लागून सक्रीय कार्यकर्त्यांक वेंचून येवपाची संद मेळटा. हाका लागून इत्सुकांक कॉंग्रेस अॅपाचेर आपली म्हायती अपलोड करची पडटली. कार्यकर्त्यांक ह्या अॅपाचेर परत एक फावट वांगडी म्हणून नोंदणी करची पडटली. नामांकन प्रक्रिया 12 ते 18 ऑक्टोबर मजगतीं जातली. उपरांत एक म्हयनो वांगडी करपाची प्रक्रिया आनी मतदान सुरू उरतलें. अर्जांची पडताळणी केले उपरांत निमाणो निकाल जाहीर करतले.
वेंचणूक प्रक्रिया पारदर्शक उरचे खातीर पक्षान विशेश वेंचणूक अधिकारी वेंचल्यात. राज्यांत मंडळ पांवड्यार 21, विधानसभा समिती 33, जिल्लो समितीत 37, जाल्यार राज्य समितींत 69 वांगड्यांची निवड जातली. कांय सुवातो आरक्षीत आसतल्यो.
गोंयांत रावपी तरणाट्याक वेंचणुकेंत उबो रावपाची संद मेळटली. कॉंग्रेस हो एकूच पक्ष जातूंत पारदर्शक वेंचणुको घेवन अध्यक्षाची निवड करतात. नवी समिती गोंयच्या तरणाट्यां खातीर बरें काम करतली अशें पाटील हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
