भांगरभूंय | प्रतिनिधी
दिवचल: वळवय धक्या वेल्यान सुर्ला वचपी चांदोर नांवाची फेरीबोट प्रवाशांक देंवोवपा खातीर बिरेस्तारा 2 आॅक्टोबराक रातच्या णवांक सुमार सुर्ला आयली तेन्ना स्कुटरी वेल्यान आयिल्ल्या एकल्यान फेरी कामगारांक गाळी मारपाक सुरवात केली. उपरांत ताणें रामकृष्ण फडते (58, वळवय) ह्या फेरीबोट कर्मचार्याक गंभीर जखमी केलो. फुडें जखमीक वाटावपा खातीर गेल्ल्या हेर कामगारांकूय ताणें जिवे मारपाची धमकी दिली आनी उपरांत एका अनोळख्य वांगडा थंयच्यान दुचाकी वेल्यान पळ काडलो. जखमीक उपचारा खातीर बेगोबेग जीएमसींत व्हेलो. सध्या ताचेर उपचार सुरू आसात.
दिवचल पुलीस सुत्रां कडल्यान मेळिल्ले म्हायती प्रमाण, हल्लो करप्याचें नांव रुपेश नायक (40, धाकूल, मायणी, न्हावेली- साखळे) अशें आसा. तो हल्लो करून पळून गेलो. मात आरोपी ताच्या घरा सापडूंक ना. तो फरारी जालो. उपरांत पुलिसांक दुबावीत पडोश्या दिकेन गेला आनी रानांत लिपून बसला अशी म्हायती मेळ्ळी. पीआय विजय राणे हांचे देखरेखी खाला पीएसआय श्रीधर कामत, पीएसआय विराज धावसकार, नीलेश फोगेरी, विशाल परब, दयेश खांडेपारकार आनी संदीप पिरणकार हांचो आसपाव आशिल्लो एक पंगड तयार केलो. शुक्रारा मध्यानराती आनी दिसभर पुराय रानांत सोद घेतलो. 16 वरां परस चड काळ चालिल्ले सोद मोहिमेंत 24वरां भितर दुबाविताक अटक केली.
दुबावितान गुन्यांव करतना वापरिल्लें वाहन मेळ्ळें. गुन्यांव करतना वापरिल्लें शस्त्र आजूनय जप्त करूंक ना आनी दुसरो दुबावीत अनिकेत नावेलकार, (28, रा. फणसवाडी, नावेले) जो मुख्य दुबाविता वांगडा फाटल्यान बशिल्लो, ताकाय अटक केली.
ह्या प्रकरणांत दिवचल पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
