भांगरभूंय | प्रतिनिधी
गोंय हें पर्यटन राज्य. हांगा पर्यटना कडेन संबंदीत वेवसाय नेटान चलतात. तत्काळ सेवा, दर्जो, सरबराय बरी आसल्यार मरण ना. हांगां वेवसाय, धंदो करून फटाफट चार पयशे करपाक मेळटात, म्हूण भायले पसून हांगा येवपाक लागल्यात. सवलती, अनुदानाचो लाव घेवन कांय जाण प्रामाणीकपणान वेवसाय करतात, पूण थोडे कायद्या कडेन मस्ती करतात. पयसो मोखलो काय जाय तें करपाक मेळटा आनी तें पचताय बी, हाची खात्री जाल्ल्यान कायदो माड्डुपी वाडल्यात. थळाव्यांच्या माथ्यार मिरयां वांटपाक लागल्यात. हातूंत सगलेच भायले आसतात, असो गैरसमज कोणे करून घेवचो न्हय, आमी नीज गोंयकार पसून फाटीं नात. मडगांवच्या एका कॅफेक काम बंद दवरपाक सांगचें, अशें मानवाधिकार आयोगान प्रदुशण नियंत्रण मंडळाक कळयलां. मंडळान तसो आदेश दिल्लो, पूण ह्या कॅफेन तो पाळूंक नाशिल्ल्याचें आयोगान म्हणलां. ह्या कॅफे आड कांय म्हयन्यां पयलीं व्हिडियो व्हायरल जाल्ले. आपूण दिता तो आदेश संबंदीत पाळटात कांय नात, हाचे कडेन मंडळाची आडनदर जाल्ल्याचेंय आयोगान म्हणलां. एक्झॉस्ट फॅन, ग्रांयडराक लागून आवाजाचें प्रदुशण जाता. इमारत थरथरता, रांदचेकुडीक लागून वयल्या फ्लॅटांतली जमीन तापता अशी कागाळ एका ज्येश्ठ नागरिकान केल्ली. प्रदुशण नियंत्रण मंडळान कॅफेच्या धनयाक साबार आदेश दिल्ले. ताका पाळो दिवन जाय ते बदल करतलों, अशें आस्वासन ताणें दिल्लें. मात तें ‘जुमला’ थारिल्ल्याचें सिद्ध जालें आनी आयोगाक भितर सरचें पडलें. गोंयांत हेर कडेनूय असलेच प्रकार आसूं येतात.
खरें म्हणल्यार, आवाज वा हेर कसलेंय प्रदुशण जाता, असलो वेवसाय निवासी इमारतींत सुरू करपाक मेळना. मात आमच्या देशांत, सगल्याच इमारतींनी वयर फ्लॅट आनी सकयल (वा फ्लॅटांतूच) वेवसायीक आस्थापनां पळोवंक मेळटात. ताका लागून आवाज- हवेचें प्रदुशण, कंपनांं, बुरशेपणा जाल्यार ताचो मनस्ताप थंय रावपी लोकांक जाता. हाॅटेलाचो परवानो वेवसायीक वापरा खातीर आसा काय ना, तें पयलीं पळोवपाक जाय. थंय आस्थापन सुरू करपाक कायद्यान परवानगी आसा काय ना, तें जाणकारांक विचारपाक जाय. स्वराज्य संस्था, अन्न आनी वखदां प्रशासनाक हाची म्हायती दिवंक जाय. रातच्या 10 उपरांत आवाज करपाक कायद्यान मनाय आसा. स्वराज्य संस्थां कडेन कागाळ केली म्हूण हें बंद जातलेंच अशें ना. हांगा प्रदुशण मंडळाक खुंटयाळ्याक लावपी आसात, ते पंच, नगरसेवकाक आयकतात? घाणयारें उदक व्हांवन वचपाची वेवस्था जाय, उजो लागचो ना, हाचीय खबरदारी घेवंक जाय. धनी काना- मनार घेना जाल्यार ताचे वांगडा बसका घेवन ताका सगलें समजावन सांगपाक जाय, सोसायटीची नोंद जाल्ली आसल्यार तिच्या नेमांत हें आस्थापन बसता काय ना, तें पळोवंक जाय. आयज काल पयशांच्या नेटार वा वयर मेरेन इश्टागत आशिल्ल्यान सगलेच दादागिरी करतना दिसताक. ताका लागून सामान्य भौस भियोवन वागता.
नागरिकांनी अन्न आनी वखदां प्रशासनाच्या संपर्कांत आसल्यार बरें. कोण कायदो पाळिनात, जाल्यार कागाळ करूंक मेळटली. बरेच फावटी कागाळ करतात, तांकां कोण वांगड दिनात. असल्या गजालींनी एकवट म्हत्वाचो, हें आमी विसरूंक फावना.
अन्न आनी वखदां प्रशासनान सप्तकांत चार दीस तरी खावपा- पिवपाच्या दुकानांनी, हाॅटेलांनी तपासणी करपाक जाय. गोंयकारांची भलायकी इबाडल्या, ताका रांदचेकुडींतलीं बुरशेंपणान जापसालदार आसूं येतात. लोकांनीय खंयूय वतना जतनाय घेवची. खंयच्या वेळार कितेंय खावप धोक्याचें थारूं येता.
कायदेशीर मार्गान कोणेंय गोंयांत येवन वेवसाय करूं येता, पूण तो करतना थळाव्यांक त्रास, मनस्ताप जावचो ना, हाची जतनाय घेवची. संबंदीत वेवसायिकाची ती लागणूक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
