मुंगूल गँगवॉर: तीग दुबावीत शरण

भांगरभूंय | प्रतिनिधी

दुबावीत वकिला सयत दक्षीण जिल्हो पुलीस मुख्यालयांत

मडगांव: मुंगलार गँगवॉर प्रकरणांत फातोड्डें पुलिसांनी हाचे आदीं 25 दुबावितांक अटक केल्या. शुक्रारा दुबावीत अमोघ नायक, व्हॅली डिकॉस्टा, प्रकाश करबार हे पुलिसां मुखार शरण आयले. उपरांत दुबावितांक फातोड्डें पुलिसांनी अटक केली.

मुंगलार माडेल हांगासरल्या शगूण हॉटेला कुशीक 12 ऑगस्ट दिसा गाडी आडावन तरसाद, कोयतो, सोडा बाटल्यो हांचो वापर करून दुबावितांनी फारपेट केल्लो. हें गँगवॉर आशिल्ल्याचें आतां पुलिसांनी स्पश्ट केलां. हातूंत वॉल्टर गँगाचे रफीक ताशान (24) आनी युवकेश सिंग बदैला (20) हे गंभीर जखमी जाल्ले.

दक्षीण गोंय पुलीस अधिक्षक टिकमसिंग वर्मा हांच्या फुडारपणा खाला विवीध पंगड तयार करून गँगवॉरांत वांटेकार आशिल्ल्या दुबावितांक अटक केली. आतां मेरेन दुबावीत विल्सन कार्व्हालो, शाहरुख शेख (रा. दवर्ली), रसूल शेख (रा. मडगांव), मोहम्मद अली (24), वासू कुमार (24), सूरज माझी (19), मलीम शेख (18), गौरांग कोरगांवकार (24) हाचे उपरांत सुनील बिलावर (20, रा. घोगळ, मडगांव), जॉयस्टन फर्नांडीस (20, नेरूल), इम्रान बेपारी (38, रा. सांता क्रुझ), अक्षय तलवार (22, रा. ताळसाझर), अविनाश गुंजीकर (31, रा. नावेली), परशुराम राठोड (32, रा. बेळगांव), दीपक कट्टीमणी (47, रा. आकें बायश), अमर कुलाल, ताहीर, सलीम उपरांत महेंद्र नायक (21, रा. चिंबल), लुकआवट नोटीस जारी केल्ललो राहुल तलवार आनी अमोघ नायक हांचो वांगडी मंदार प्रभू गांवकार (बोरी) आनी सूरज नायक बोरकार, राजेश हेलमा, राजस्थानांत पंगड धाडून बिश्नोई गँगा कडेन संबंद आशिल्लो आनी आर्माची पुरवण केल्ल्याचो दुबाव आशिल्लो ओमसा हाका अटक केली.

ह्या प्रकरणांत दुबावीत अमोघ नायक हाणें अटकपूर्व जामिना खातीर अर्ज केल्लो. ताचो जामीन अर्ज भायरायला. व्हॅलीच्या अर्जाचेर 4 ऑक्टोबराक सुनावणी जातली.

शुक्रारा दुबावीत अमोघ नायक, व्हॅली डिकॉस्टा, प्रकाश करबार हे तिगूय जाण पुलिसां मुखार शरण आयले. तिगूय दुबावीत आपल्या वकिला सयत दक्षीण गोंय जिल्हो मुख्यालयांत येवन पुलीस अधिक्षक टिकमसिंग वर्मा हांचे मुखार समर्पण केलें. उपरांत फातोड्डें पुलिसांनी तांकां अटक केली.

पुलीस अधिक्षक टिकमसिंग वर्मा हांणी सांगलें, मुंगलार 12 ऑगस्ट दिसा जाल्ल्या फारपेटांत आतां मेरेन 25 दुबावितांक अटक केल्या. आतां दुबावीत अमोघ नायक, प्रकार करबार, व्हॅली डिकॉस्टा हे तिगूय जाण शरण आयल्यात. तांकां अटक केल्या.

दुबाविताचे वकील अ‍ॅड. स्पेन्सर व्हिएगश हांणी सांगलें, दुबावितांनी पुलिसांची नोटीस मेळ्ळे उपरांत तपासांतले चवकशी खातीर आयल्यात. अटक करप वा हेर गजाली ह्यो तपास अधिकाऱ्याचेर निंबून आसात. दुबावीत घरांतूच आशिल्ले आनी पुलिसांची नोटीस मेळटकच चवकशे खातीर ते हाजीर जाले. ते शरण आयिल्ले नात जाल्यार चवकशे खातीर आयल्यात अशें तांणी सांगलें.