भांगरभूंय | प्रतिनिधी
मानवाधिकार आयोगाची शिफारस
पणजी : मानवाधिकार आयोगान प्रदूशण नियंत्रण मंडळाक मडगांवच्या एका कॅफेचेंे कामकाज बंद दवरपाचो आदेश दिवपाची शिफारस केल्या. ह्या कॅफेन ह्यान पयलीं प्रदूशण नियंत्रण मंडळान दिल्ले आदेश पाळूंक नाशिल्ल्याचें आयोगान म्हणलां. मंडळान त्या हॉटेल बाबतच्या स्वताच दिल्ल्या आदेशाकडेन आडनदर करून निश्काळजीपणां दाखयिल्ल्यान
मानवाधिकार पाळूंक नाशिल्ल्याचें निरीक्षण आयोगान नोंद केलां.
हे विशींची अदीक म्हायती अशी, मडगांवच्या एका ज्येश्ठ नागरिकान नागरिकान तांचे इमारतींत सुरू आशिल्ल्या कॅफे विशीं आयोगा कडेन कागाळ केल्ली. हॉटेलाची रांदची कूड इमारतीचे तळ माळयेर आशिल्ली. उपरांत तेच सुवातेर मॅझेनायन माळी करून आडायली. हांगा तीन उद्देगीक दर्जाचें एक्झॉस्ट फॅन बसयले. तशेंच दोन व्हड ग्रायंडरूय बसयले. हाका लागून व्हडा प्रमाणांत आवाजाचें प्रदुशण जावपाक लागलें. हांगची जमीन हालूंक लागली.
हे विशीं त्या मनशान कागाळ केले उपरांत प्रदूशण नियंत्रण मंडळान हांगची पळोवणी केली. गरजेचे परवाने नाशिल्ल्यान कॅफे तात्पुरतो बंद दवरपाचे आदेश दिले. पळोवणी करतना मंडळाच्या अधिकार्यांनी त्या मनशाच्या बॅडरुमाचे सकयले माळयेर कॅफेचो गॅस स्टोव्ह आशिल्ल्यान बेडरुमाची जमीन गरम जाता अशें निरीक्षण नोंद केलें. मंडळान कॅफेक एक्झॉस्ट फॅनाची उंचाय इमारतीच्या पांख्या वयर मेरेन व्हरपाक सांगलें. तशेंच रांदची कडू मॅझेनायन माळये वेल्यान तळ माळयेर हालोवपाक सांगलें.
मंडळान कॅफे हालचें न्हय आनी जमीन गरम जावची न्हय म्हण उपाय काडपाचे आदेशूय दिल्ले. हाचेर कॅफेन एप्रील 2025त आपूण हे आदेश पुराय करतलों अशी म्हायती मंडळाक दिल्ली. मात आयोगाक मेळिल्ले म्हायती प्रमाण कॅफेन आदेश योग्य तरेन पाळूंक नाशिल्ले. हाका लागूनच आयोगान प्रदूशण नियंत्रण मंडळाक तांचे आदले आदेश पाळटले तो मेरेन कॅफे बंद दवरपाचे आदेश दिवचे अशी शिफारसूय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
