भांगरभूंय | प्रतिनिधी
आयज काल जायत्या भुरग्यांच्या पालकांची कागाळ आसता की आमचे भुरगे मोबायला वयले कार्टून, पदां, डान्स वा गेम्स पळयले बगर अन्नाचो गोटोय तोंडांत घेनात. मोबायल फोन भुरग्याच्या हातात दिवपाची संवय आवय, बापायन केल्ली आसता. भुरगें नखरे करतात, प्रत्येक घांसाक न्हयकार दितात, तेन्ना तांकां ओगी करपाक आनी जेवणाचो घांस भरोवपाक मोबायल भुरग्यांच्या मुखार धरतात. तें पळोवपांत गुल्ल जाल्लो भुरगो बकाबका जेवता म्हूण पालक खोशी जातात. पूण ल्हवू ल्हवू भुरग्याक दिसता की हातान मोबायल आसल्यारुच हांव जेवतलो.
आमच्या जाण्ट्यांच्या तेंपार भुरग्याची आजी, पणजी ताका हांडीर मारुन भायर पोरसांत, आंगणांत, पडवेर घरांतले सुणे, माजरां, झाडा वयल्यो चिवू, काऊ, फुलपांखे, भिरमुट्यो दाखोवन घांस भरयताल्यो. भुरगीं चिवू, काऊक पळोवन बेगीन ताट खालीं करतालीं. सकाळीं दूद, च्या, चपाती, पाव चिवूचो घांस, काऊचो घांस म्हणून तांच्या तोंडांत घालतालीं. भुरगींय खोशेन आजी, पणजेचे आयकतालीं. सगले खूश जाताले.
आतां जमानो बदल्ला. झाडांची कत्तल केल्ल्यान चिवू, काऊंचो आंकडो देंवला. आठ – आठ दीस कावळो, चिमणी दिसना. दिसल्यार तें आमचें भाग्य.
ल्हान भुरग्याक मोबायल दाखोवन घांस भरोवप सामकें चुकीचें. हातूंत ताचो दोश कांय ना. ही आवयन वा बापायन केल्ली वायट संवय. बालमानसोपचार तज्ञांच्या मतान, जेवतना मोबायलाचेर लक्ष दिल्यार भुरग्याचें अन्ना वांगडा आशिल्लें नातें तुट्टा. अन्नाची रुच, वास, गुणवत्ता ताका कळना. सतत स्क्रिनी कडेन पळोवन ताच्या मेंदवाचे वाडीचेर परिणाम जाता. दोळ्यांचेर ताण येता. मानसीक भलायकेचेर परिमाण जाता. वागप इबाडटा.
हाचेर उपाय म्हणल्यार, ताच्या हातांतलो मोबायल ओडून घेवं नाकात. कारण भुरगें चिडचिडे जावं शकता. मोबायल जेवचे पयलीं दुसरे कुडींत दवरप. जेवतना ताका गजाली सांगप. रामायणांतलो राम, मारुतीच्यो गोश्टी सांगात. तुमी स्वता बडबडगीतां म्हणात. ताचे वांगडा संवाद सादात. ताका सुकण्यांच्या, जनावरांच्या आवाजाची वळख करून दियात. जनावरां, फळां, फुलां, सुकणी हांचे चित्रां आशिल्ले चार्ट, कॅलेंडरां दाखयात. तें करतना ताका अन्न भरयात. ताका एकटो जेवपाक वाज येता. तुमी उलयत रावल्यार तो दोन घांस चड खातलो. ताचे आवडीचीं फळां, चपाती, भाजी दियात. मोबायलाचो अतिवापर करूं नाकात. भुरग्यांक आपले पसून पयस दवरूं नाकात.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
