भांगरभूंय | प्रतिनिधी
मुख्यमंत्री: सांखळे शंकर भांडारी यादस्तीक सुवाळो दबाज्यान
केरी-सत्तरी: कोंकणी भास ही गोंयचो स्वाभिमान. ती गोंयकारांची वळख तेचपरी तांचो फुडार जावन आसा. भारतीय विद्यार्थ्यांचें मुळावें शिकप तांचे आवयभाशेंतल्यान जावंक जाय अशें मुख्यमंत्री डॉ. प्रमोद सावंत हांणी सांगलें. ते सांखळी कोंकणी सेवा केंद्रान आयोजीत केल्ल्या शंकर भांडारी यादस्तीक सुवाळ्यांत मुखेल सोयरे ह्या नात्यान उलयताले. हो सुवाळो सांखळे नगरपालिका सभाघरांत जालो.
ह्या वेळार गोवा कोंकणी अकादमेची पालवी अध्यक्ष रमेश घाडी, सांखळी नगरपालिकेच्यो नगराध्यक्षा सिद्धी प्रभू परोब, कोंकणी सेवा केंद्राचे अध्यक्ष श्याम फातर्पेंकार, उद्देजक सतीश माशेलकार बी मानेस्त हाजीर आशिल्ले.
ह्या वेळार सतीश माशेलकार हांचेंय उलोवप जालें. सुरवेक प्रा. अभिजीत पेडणेंकार हांणी येवकाराचें उलोवप केलें. समिक्षा शिरोडकार आनी रुसी परब हांणी कार्यावळीचें सुत्रसंचालन केलें. जाल्यार भांडारी प्रा. अनंत पिसुर्लेंकार हांणी हाजीर आशिल्ल्यांचें उपकार आठयले.
ह्या सुवाळ्यांत लेखक तशेंच प्रकाशक झिलू गांवकार हांचो मुख्यमंत्र्या हस्तुकीं भोवमान जालो. अनील वेर्णेंकार हांणी भोवमानमुर्तीची वळख करून दिली.
तशेंच ह्या सुवाळ्यांत शालांत मंडळाच्या धावी आनी बारावीचे परिक्षेंत कोंकणी विशयांत गोंय राज्यांत पयले येवपी विद्यार्थ्यांक भांगरा पदकां भेटोवन तांचो भोवमान करतात. अंदूं वर्सा बाब वर्नन डिसिल्वा आनी बाय मेलन्सी डिकॉस्टा ह्या विद्यार्थ्यांक वळेरेन धावी आनी बारावी खातीर हो भोवमान फावो जालो. दोगांकूय कोंकणींत दरेकी 98 प्रतिशत गूण फावो जाल्यात. ह्या वयल्या प्रतिश्ठीत पदकांचे प्रायोजक आसात उद्देशक सतीश माशेलकार आनी सांखळेचे आदले नगराध्यक्ष धर्मेश सगलानी.
तेभायर ह्या सुवाळ्यांत दिवचल आनी सत्तरी म्हालांतल्या शालांत मंडळाच्या परिक्षांनी कोंकणी विशयांत चडावत गूण मेळयिल्ल्या विद्यार्थ्यांक इनामां भेटोवन तांचो भोवमान करतात. अंदूं अशा पन्नास जैतीवंत विद्यार्थ्यांक हीं तस्रिपां फावो जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
