भांगरभूंय | प्रतिनिधी
पणजी : केंद्राच्या आत्मनिर्भर भारता प्रमाण गोंयांत स्वयंपूर्ण गोंय अभियान सुरू केलें. हाचे वरवीं थळाव्या उत्पादकांक उर्बा दिली. हाका लागून एका काळार खुबश्यो गजाली आयात करपी गोंय स्वयंपूर्ण जालां. कांय मळांचेर गोंय थळावीं उत्पादनां निर्यात करता अशें मुख्यमंत्री डॉ प्रमोद सावंत हांणी सांगलें. बिरेस्तारा गांधी शिल्प बाजाराच्या उक्तावणा वेळार ते उलयताले. ह्या वेळार उद्देग मंत्री मॉविन गुदिन्हो, आमदार आंतोनियो वाझ हजर आशिल्ले.
आमी सगल्यांनी थळाव्या उत्पादकांक फाटबळ दिवप गरजेचें. गांधी जयंती निमतान आयोजीत प्रदर्शनांत दरेकल्यान उण्यात उणें एक खादी कपडो विकत घेवचो. हाका लागून हस्त कलाकारांक आनीक उत्पादनां तयार करपाक उर्बा मेळटली. प्रधानमंत्री नरेंद्र मोदींनी आत्मनिर्भर भारत सुरू केल्ल्यान आयज जायत्या कारागिरांक विवीध येवजण्यांचो लाव मेळटा. हस्तकलाकारांच्या उत्पादनांक
आंतरराष्ट्रीय पांवड्यार मागणी येता. महात्मा गांधीनी नितळसाण, स्वयंपूर्णता, अंत्योदय अश्या जायत्या गजालीं विशीं विचार मांडिल्ले. मात फाटलीं कितलींशींच वर्सां हे विशीं कांयच जावंक ना. नरेंद्र मोदी प्रधानमंत्री जाले उपरांत ह्या कल्पनांचेर प्रत्यक्षांत काम सुरू जालें. महात्मा गांधी उपरांत नरेंद्र मोदी हे एकलेच राजकीय फुडारी आसात जांणी रस्त्यार देंवून झाडू हातांत घेतलो. लोकल फॉर व्होकलाक लागून थळाव्या उत्पादकांक सन्मान मेळ्ळो अशें मुख्यमंत्र्यानी सांगलें.
थळाव्या हस्तकलाकारांक उर्बा दितले
मंत्री मॉविन गुदिन्हो हांणी, उद्देग खात्या वतीन थळाव्या हस्तकलाकारांक उर्बा दितले. हाका लागून उद्देग खातें आनी खादी ग्रामोद्येग मंडळा वतीन एकठांय यत्न करतले. बरी पॅकेजिंग, ब्रॅण्डिंग केल्यार राज्यांतल्या उत्पादनांक आनीक वाव मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
