भांगरभूंय | प्रतिनिधी
भाड्याच्या नांवान गाडयांची चोरी
म्हापशेंः गोंयच्या नोंदणीकृत भाड्यान घेतिल्ल्या खाजगी कार गाडयांची नंबर पट्टी बदलून त्यो चोरपी टोळयेच्या फरारी तिसर्या साथीदाराचो सोद कोलवाळ पुलीस घेतात. घडणुके सुवातेर पुलिसांचो छापो पडटांच दुबावीत पळून गेल्लो.
ह्या प्रकरणांत अटक केल्ल्या दीप रमणीकभाई अघेरा (28, रा. गुजरात) आनी हरप्रीत सुखदेव सिंग (40, रा. राजस्थान) ह्या दोगांची पुलिसांनी चवकशी केली तेन्ना तांणी साथीदाराचें नांव उक्तें केलें. पुलीस छाप्या वेळार हो दुबावीत घडणुके सुवातेरूच कांय अंतराचेर आशिल्लो. मात पुलिसांक पळोवन ताणें घडणुके सुवातेवेल्यान पळ काडलो. आजूनय पुलिसांक तो खंय आसा तें कळूंक ना.
मजगतीं, अटक केल्ल्या वयल्या दुबावितांची न्यायालयान दिल्ले पांच दीस बंदखणीची मुजत शुक्रार 3 तारखेर सोंपिल्ल्यान पुलीस आनीक बंदखणी खातीर फाल्यां तांकां दिवचल न्यायालयांत हाजीर करतले.
मजगतीं, माडेल, थिवीच्या मांगिरीश कॉलनींत फाटल्या आयतारा 28 तारखेर रातच्या सुमार 9 वरांचेर कोलवाळ पुलिसांनी ही कारवाय केल्ली. सुत्रांच्या म्हायतीच्या आदारार पुलिसांनी घडणुके सुवातेर छापो घालून दोन फॉर्च्यूनर गाडयो जप्त करीत दुबावितांक अटक केल्ली. दुबावितांनी जीए 07 एन 2259 आनी जीए 05 एफ 6888 नंबराच्यो ह्यो खासगी गाडयो पणजे आनी म्हापशेंच्यान भाड्यान घेतिल्ल्यो. उपरांत ह्यो गाडयो चोरून व्हरपाच्या हेतान दुबावितांनी गाडयेवेली मूळ नंबर प्लेट काडून ताचे सुवातेर आरजे 23 यूए 6500 आनी पीबी 09 एएन 0630 अश्यो बनावट नंबर प्लेट लायल्यो. ह्या गाडयांचें मोल 50 लाख 87 हजार रूपया आसा. उपरांत जीपीएस जॅमर डिव्हाईस वरवीं गाडयेचीं जीपीएस यंत्रणां डिसकनॅक्ट केल्ली. चोरिल्ल्यो गाडयो गुजरात आनी राजस्थानांत व्हेले उपरांत त्यो विकपाचो ते टोळयेचो हेतू आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
