भांगरभूंय | प्रतिनिधी
पणजी : भारत आनी गोंय आत्मनिर्भर, स्वयंपूर्ण, नशामुक्त करपाचो संकल्प करुया आनी हे खातीर सगलीं एकवटान यत्न करुया, असो उलो मुख्यमंत्री डॉ. प्रमोद सावंत हांणी मारलो.
पोरणें गोंयां आयोजीत केल्ले महात्मा गांधी जयंती आनी लाल बहादुर शास्त्री जयंतीचे कार्यावळींत मुख्यमंत्री उलयताले. ह्या वेळार केंद्रीयमंत्री श्रीपाद नायक, आमदार राजेश फळदेसाय, जिल्लो पंचायतीचे वांगडी धाकू मडकयकार, आदली मंत्री निर्मला सावंत, आदले आमदार धर्मा चोडणकार आनी हेर मानेस्त हाजीर आशिल्ले.
नितळ, नशामुक्त, कुशळटाय युक्त, घटमूट भारत घडोवप हें महात्मा गांधी हांचें सपन आशिल्लें. प्रधानमंत्री नरेंद्र मोदी महात्मा गांधी हांचें हें सपन पुराय करपा खातीर वावुरतात. हेच फाटभूंयेर नितळ, नशामुक्त, स्वयंपूर्ण, कौशल्ययुक्त गोंय घडोवपाक गोंय सरकारूय यत्न करतात. हे खातीर समस्त गोंयचे जनतेन सहकार्य करचें अशें डॉ. सावंत हांणी स्पश्ट केलें. गोंयांत म्हजें घर येवजणे खाला 4 ऑक्टोबराक घरां अधिकृत करून दितले. तातूंत कोमुनिदाद, मोकासे, आल्वारा ह्या जमनीवेल्या घरांचो आसपाव आसतलो अशें मुख्यमंत्र्यानी मुखार म्हणलें.
प्रधानमंत्री नरेंद्र मोदी हांच्या वाडदिसा निमतान सेवा पंधरवडा खाला ‘नितळसाण ही सेवा’ हो उपक्रम राबयलो. ताका बरो प्रतिसाद मेळ्ळो. नितळ, विकसीत ग्राम, स्वयंपूर्ण गोंय करपा खातीर यत्न फळादीक जातात. स्वयंपूर्ण गोंय तयार करपाक केल्ले स्वयंपूर्ण गोंय येवजणेक पांच वर्सां पुराय जातात. हाका बरो प्रतिसादूय मेळटा. केंद्र सरकाराच्यो 80 टक्के, जाल्यार राज्य सरकाराच्यो 100 टक्के येवजण्यो सगल्या मेरेन पावप शक्य जालां, अशेंय तांणी म्हणलें.
गोंय पर्यटन राज्य आशिल्ल्यान पर्यटक आकर्शीत जावचे खातीर नितळसाण राखपाचेर भर दिवप गरजेचें. हे खातीर सगल्यांनी योगदान दिवचें असो उलो मुख्यमंत्र्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
