भांगरभूंय | प्रतिनिधी
कुडणें सरकारी शाळेक मनोहर पर्रीकार हांचें नांव
दिवचल: येवपी शिक्षणीक वर्सा सावन स वर्सां पुराय जाल्ल्या विद्यार्थ्यांकूच पयले यत्तेंत प्रवेश मेळटलो. नव्या शिक्षणीक धोरणा प्रमाण ह्या निर्णयाची अंमलबजावणी जावपाची आशिल्ल्यान, हाका लागून गोंयांत सुमार 4 हजार विद्यार्थ्यांचे प्रवेश उणे जावपाक शकतात. ही तूट 2027 वर्साच्या शिक्षणीक वर्सा सावन भरतली, अशें मुख्यमंत्री डॉ. प्रमोद सावंत हांणी म्हणलें.
फाळवाडो, कुडणेंच्या सरकारी प्राथमीक शाळेक आदले मुख्यमंत्री सर्गेस्त मनोहर पर्रीकार हांचें नांव दिलें. ह्या सुवाळ्यांत मुख्यमंत्री उलयताले. ह्या वेळार माचयेर शिक्षण संचालक शैलेश झिंगडे, कुडणेंचे सरपंच बाबला मळीक आनी हेर मानेस्त हाजीर आशिल्ले.
पालक आपल्या भुरग्यांक पांच वर्सां पुराय जालीं काय पयलेंत प्रवेश दितले म्हूण अपेक्षीत आसता. हे खातीर सगलेच पालक तयारूय आसतात. मात भुरग्यांचे मानसीक आनी बुद्धीचे तांकीचो कोणूच विचार करिनात. भुरग्यांचेर ल्हान पिरायेचेरूच अभ्यासाचो ताण पडचो न्हय म्हणून सरकाराच्या नव्या शिक्षणीक धोरणांत विचार केला, अशेंय मुख्यमंत्र्यान मुखार सांगलें.
गोंयच्या सगल्या सरकारी मुळाव्या शाळांक नवें रुप दिवपाचें काम 2012 वर्सा स्थापन जाल्ले आदले मुख्यमंत्री स. मनोहर पर्रीकार हांच्या भाजप सरकारान केलें. गांवगिर्या वाठारांतल्या सरकारी शाळांनी मात थळावे विद्यार्थी भरती करिनाशिल्ल्यान ह्या शाळांचो आंकडो देंवता. ही खंत आसा. हाका जायतीं कारणां आसात. गांवांतल्या विद्यार्थ्यांचो शारांतल्या शाळांनी प्रवेश करप, वा गांवांतलीं कुटुंबां शारांत स्थलांतर जावप. हाका लागून आयज गांवगिर्या भागांतल्या चडश्या शांळांनी बिगर गोंयकारांचीं भुरगीं चड दिसतात, अशेंय मुख्यमंत्र्यानी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
