थळाव्या शेतकारांचीं रोजां घेवचीं

भांगरभूंय | प्रतिनिधी

शेतकी संचालक : रोजां शेतकारांचे तपशील शेतकी खात्याच्या वॅबसायटीचेर उपलब्ध

भांगरभूंय । प्रतिनिधी

पणजीः दसऱ्याच्या सणात रोजांच्या थळाव्या शेतकारांक प्राधान्य मेळचे खातीर शेतकी खात्यान बरो फुडाकार घेतला. रोजांची लागवड करपी शेतकारांचे तपशील शेतकी खात्याचे वॅबसायटीचेर घातल्यात. जो शेतकारा लागीं आसा त्या शेतकारा कडेन संपर्क करून हीं फुलां विकतीं घेवचीं, असो उलो शेतकी खात्याचे संचालक संदीप फळदेसाय हांणी मारला.

व्होकल फोर लोकल उपक्रमा खाला शेतकारांचीं नांवां, पत्तो आनी फोन नंबर शेतकी खात्याचे वॅबसायटीचेर घातल्यात. गोंयकारांनी ह्या शेतकारां कडल्यानूच रोजां विकतीं घेवन थळाव्या शेतकारांक स्वंयपूर्ण करपा खातीर प्राधान्य दिवचें. जे वरवीं गोंयकारांचो पयसो गोंयकारां कडेन वचून तो गोंया भितर घोळटलो. रोजांचे दर थारवपा विशींचो निर्णय आमी शेतकारांचेर सोडला, अशे फळदेसाय हांणी म्हणलां.

गोंयांत रोजांची लागवड गांवागांवांनी जाता आनी लोक रस्त्यार येतना वतना चड करून शेतांत वचून तांचे कडल्यान रोजां घेवप पसंत करतात. जर ह्या शेतकारांक आमी बरे भशेन प्रसिध्दी दिली जाल्यार तांकां रस्त्यार वा फलोत्पादनाच्या दालनांत येवन फुलां विकपांची गरज लागची ना आनी हें मतींत दवरून आमी हो उपक्रम चालीक लायला. जर हीं रोजां बाजारभावाच्या दरांत विकतात आसल्यार लेगीत गोंयकारांनी गोंयकारांकूच प्राधान्य दिवचें, असो उलो फळदेसाय हांणी मारला.

अंदूं रोजांचीं लागवड करपी शेतकारांची संख्या 50 टक्क्यान वाडल्या. अंदूं सुमार 200 नवे शेतकार तयार जावन सुमार 450 शेतकार रोजांचें पीक घेतात. हातूंत तरणाट्यांनी चड पुढाकार घेतला. तशेंच पोरूंचे तुळेंत अंदूं रोजांच्या लागवडीच्या क्षेत्रांत सुमार 4 हॅक्टर इतली वाड जाल्या, अशी म्हायती फळदेसाय हांणी दिली.

अंदूं दर हॅक्टर 8-10 टन इतली रोजांची पिकावळ तयार जावन 28 हॅक्टर क्षेत्रांत 288 टन पीक तयार जातलें. पोरूं 255 टन इतली पिकावळ नोंद जाल्ल्यान अंदूं रोंजांचे पिकावळींत 33 टनांनी वाड जाव येता, अशी शक्यताय शेतकी खात्यान उक्तायल्या, अशें फळदेसाय हांणी म्हणलें.

गोंयांत हळदुवीं आनी नारींग रंगाची दोन भशेनचीं रोजां जातात. हळदुव्या रोजांत कोलकाता हळदुवो आनी टॅनीस बॉल ही प्रजाती. जाल्यार नारींग रोजांत पितांबरी, कोलकाता नारींग आनी अश्टगंधा ही प्रजाती गोंयांत रोयतात. दर हॅक्टरा फाटल्यान राज्य सरकार कडल्यान 55 हजार आनी केंद्र सरकार कडल्यान 22 हजार मेळून दर हॅक्टर 75 हजार रुपयांचें अनुदान रोजांचेर शेतकारांक मेळटा, अशें फळदेसाय हांणी सांगलें. गोंयांत भायल्या रोजांच्यो बियो आमी शेतकारांक लागवडी खातीर दिल्यात. रोजांची लागवड करपा खातीर 65 दीस वतात आनी रोजांची पिकावळ जावपा खातीर 90 दीस लागतात. लागवड पावसाळ्यांत सुरू जाता आनी दसऱ्या मेरेन पिकावळ तयार जाता आनी दिवाळेच्या पाडव्या मेरेन शेतकारांक पिकावळीचो लाव घेवपाक मेळटा, अशी म्हायती फळदेसाय हांणी दिली.