भांगरभूंय | प्रतिनिधी
एकल्याक मरण, बशीतले प्रवासी किरकोळ जखमी
रामनगर: बेळगांव-गोंय म्हामार्गा वेल्या तिनयघांटार काल (बुधवारा) सकाळीं 9.20 वरांच्या सुमाराक एकेच कडेन विवीध चार वाहनांचो अपघात जावन एकल्याक मरण आयलें जाल्यार एकलो गंभीर जखमी जाल्ल्याची घडणूक घडली.
हॉस्पेट सावन गोंयचे दिशेन बारा टायराच्या ट्रकाक (केए 33 बी 6327) ओव्हरटेक करून व्हीआरएल कंपनीची बस (जीए 07 टी 2571) वता आसतना गोंयच्यान चीकबल्लापूर हांगा वचपी मिनी टेम्पोक (केए 04 एसी 5931) बशीन धपको दिल्ल्यान टेम्पोंतलो ड्रायव्हर राजशेख गंगुलप्पा (रा. चिंतामणी तालुको, 26) हाका जाग्यारूच मरण येवन तो वाहनांत आडकून पडलो.
जाल्यार टेम्पोचे फाटल्यान येवपी बुलेटीन (केए 22 बी 6327) टेम्पोक धपको दिल्ल्यान चालक मारुती पाटील (रा. शिरोली, खानापूर) हो जखमी जालो. मजगतीं, मिनाची येरादारी करपी ट्रकाक ओव्हरटेक करतना बशीन धपको दिल्ल्यान ट्रक रस्त्या कुशीक लंवडलो.
अपघाताची घडणूक कळटकच जोयडा पुलीस स्टेशनाचे पुलीस निरिक्षक चंद्रशेखर हरीअर, तशेंच रामनगर पुलीस स्टेशनाचे उपनिरिक्षक महंतेश नायक आनी हेर पुलिसांनी घडणूक थळार धांव घेवन टेम्पोंत आडकल्ल्या ड्रायव्हराक क्रेनीच्या आदारान भायर काडून कूड रामनगर सरकारी हॉस्पिटलांत धाडून दिली.
बशीचो ड्रायव्हर आनी कांय प्रवासी किरकोळ जखमी जाले. तांकां रोखडेच दुसरे बशीन गोंयांत धाडून दिले. घडणुकेची नोंद रामनगर पुलीस स्टेशनार नोंद जावन फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
