भांगरभूंय | प्रतिनिधी
एक जखमी : फरारी टँकर चालकाक अटक
भांगरभूंय । प्रतिनिधी
वास्को : एमईएस चौका पासून कांय अंतराचेर मंगळारा 30 सट्पेंबराक सांजे वेळार जाल्ल्या अपघातांत मुंबय रावपी मधुकर परब (70) हाका मरण आयलें जाल्यार ताचो सोयरे आकाश पवार हो किरकोळ जखमी जालो. ह्या अपघाता उपरांत घडणुकेचे सुवाते वयल्यान टँकरा सयत पळून गेल्ल्या टँकर चालकाक वेर्णें पुलिसांनी झुआरीनगरांत ताब्यांत घेतलो. ताचे आड गुन्यांव दाखल केला.
पुलिसांनी दिल्ले म्हायती प्रमाण, मधुकर परब हो मुंबय जाल्यार आकाश पवार हो नागपूरांत रावता. ते दोगूय आपले मोटारींत गोंयांत आयिल्ले. पूण तांची मोटार बिघाडिल्ल्यान तांणी रेंट अ बायक घेतली. ते दुचाकी वयल्यान ते मंगळारा वास्कोच्या आरटीओ कार्यालयांत वचपाचे आशिल्ले. ते आदीं ते आपल्या सोयऱ्यांगेर जेवले आनी सांजेच्या 4 वरांच्या सुमाराक आरटीओ कार्यालयांत ते आपल्या कामा खातीर वास्को वताले. त्या वेळार फाटल्यांतल्यान आयिल्ल्या टँकराचो धपको बशिल्ल्यान ते दुचाकी वयल्यान रस्त्याचेर पडले. टँकराच्या टायरा पोंदां सांपडिल्ल्यान मधुकर परब गंभीर जखमी जाले. तांकां उपचारा खातीर चिखली उपजिल्हो हॉस्पिटलांत व्हेलो. थंय ताका मरण आयिल्ल्याचें घोशीत केलें.
ह्या अपघाता उपरांत टँकर चालकान थंय रावनासतना टँकरा सयत पळ काडलो. ताका धरचे खातीर एका दुचाकीचालकान ताचो फाटलाव गेलो, पूण तो ताका मेळूंक ना. उपरांत पुलिसांनी ताका सोदून झुआरीनगरांत अटक केली. वेर्णएं पुलिसांनी अपघाताचो पंचनामो केलो. ह्या प्रकरणांत पुलीस स्टेशनाचे निरिक्षक आनंद शिरोडकार फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
