भांगरभूंय | प्रतिनिधी
रोजां शेतकारांचे तपशील शेतकी खात्याच्या वेबसायटीचेर उपलब्ध
पणजीः दसर्याच्या थळाव्या रोजां खातीर गोंयच्या शेतकारांक प्राधान्य मेळचे खातीर शेतकी खात्यान बरो फुडाकार घेतला. थळाव्या रोजांची लागवड करपी शेतकारांचे तपशील शेतकी खात्याचे वेबसायटीचेर घातल्यात. जो शेतकारा लागीं आसा त्या शेतकाराकडेन संपर्क करून हीं फुलां विकतीं घेवचीं, असो उलो शेतकी खात्याचे संचालक संदीप फळदेसाय हांणी मारला.
व्होकल फोर लोकल उपक्रमा खाला शेतकारांचीं नांवां, पत्तो आनी फोन नंबर शेतकी खात्याचे वेबसायटीचेर घातल्यात. गोंयकारांनी ह्या शेतकारांकडल्यानूच रोजां विकत घेवन थळाव्या शेतकारांक स्वंयपुर्ण करपा खातीर प्राधान्य दिवचें. जेणेकरून गोंयकारांचो पयसो गोंयकारांकडे वचून तो गोंयाभितर घोळटलो. रोजांचें दर थारावपा विशींचो निर्णय आमी शेतकारांचेर सोडला, अशें फळदेसाय हांणी म्हणलां.
अंदूं रोजांची लागवड करपी शेतकारांचो आंकडो 50 टक्क्यांनी वाडला. ह्या वर्सा सुमार 200 नवे शेतकार तयार जावन सुमार 450 शेतकार रोजाचे पीक घेतात. हातूंत तरणाट्यांनी चड पुढाकार घेतला. तशेंच फाटले वर्साचे तुळेंत अंदू रोजांचे लागवडीच्या वाठारांत सुमार 4 हॅक्टर इतली वाड जाल्या, अशी म्हायती फळदेसाय हांणी दिली.
राज्यांत हळदुवीं आनी नारींग रंगाची दोन भशेचीं रोजां जातात. हळदुवीं रोजां कोलकाता हळदुवो आनी टॅनीस बॉल ही प्रजाती. जाल्यार नारींग रोजात पितांबरी, कोलकाता नारींग आनी अश्टगंधा ही प्रजाती राज्यांत रोयतात. ह्या वर्सा दर हॅक्टर 8-10 टन इतली रोजाची पिकावळ तयार जावन 28 हॅक्टर मळार 288 टन म्हळ्यार 100 किल इतली रोजांचें पीक तयार जातलें अशी शक्यताय शेतकी खात्यान उक्तायल्या, अशें फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
