भांगरभूंय | प्रतिनिधी
मडगांव: धिरयो प्रकरणांत कोलवा पुलिसांनी स दुबावितांचेर गुन्यांव नोंद करून तिगांक अटक केल्ली. अटक केल्ल्या ह्या दुबावितांक न्यायालयान दरेकी 25 हजार रुपयांचो बॉंड आनी तितलेच रकमेचो जामीनदार अश्या अटींचेर जामीन मंजूर केला.
माजोड्ड्यांच्या पॉवरस्टेशना लागसार 22 तारखेक ’चांदो’ आनी ’गॉडफादर’ ह्या रेड्यां मदीं धिरयांचे आयोजन केल्लें. तेन्ना ’चांदो’ ह्या रेड्यान राजेश निस्तानी (42, रा. गिर्दोली) हाचेर हल्लो केल्लो. हातूंत ताका मरण आयिल्लें. ह्या प्रकरणांत कोलवा पुलिसांनी सांतान कार्दोझो (43, रा. कुडतरी), ज्योकिम परेरा (48, रा. माजोर्डा) आनी जुझे कुलासो ऊर्फ पेले (54, रा. माजोर्डा) हांकां अटक केल्ली. ह्या तिगांय दुबावितांनी जामिना खातीर न्यायालयांत अर्ज केल्लो. दक्षीण गोंय जिल्लो सत्र न्यायालयान तांची बाजून आयकून घेवन 25 हजार रुपयांच्या वयक्तीक बॉंडाचेर आनी तितलेच रकमेच्या जामीनदाराच्या अटीचेर तांकां जामीन मंजूर केला.
मजगतीं, कॉल रेकॉर्ड्स पळयले उपरांत आनीक कांय जाणांक कोलवा पुलीस अटक करपाचे आसात. बैल आनी रेड्यांच्या धनयांच्या कॉल रेकॉर्डचे म्हायतीच्या आदारार दुबावितांक नोटीस जारी केल्या. दुबावीत मिनिनो फर्नांडिस, रुई मिनेझीस आनी राकेश हांचो पुलीस सोद घेतात. हांतल्या रुई मिनेझिस हांणी दक्षिण गोंय जिल्लो सत्र न्यायालयांत अटकपूर्व जामिना खातीर अर्ज सादर केला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
