भांगरभूंय | प्रतिनिधी
केपें म्हालांतलो बाळ्ळी, फातर्पा हो वाठार देवळांनी भरला. हांगचें एक जागृत देवस्थान म्हळ्यार श्री भुमिपुरुष सप्तकोटेश्वर शांतादुर्गा देवस्थान. सध्या, देवळांत नवरात्रोत्सव व्हडा उमेदीन सुरू आसा. फाटल्यां दसर्यान हो उत्सव सोंपतलो. हे निमतान फातर्पाच्या श्री भुमिपुरुष सप्तकोटेश्वर शांतादुर्गा देवस्थानांत मनोवपी नवरात्रोत्सव, दसर्याची मयती आमी जाणून घेवया.
फातर्पाच्या सैमीक वाठारांत हें देवूळ आसा. ह्या देवळांत आगळे-वेगळे तरेन दसरो मनयतात. श्रींच्या नवरात्री उत्सवाची सुरवात अश्विन शुद्ध प्रतिपदेक सकाळीं घटस्थापने सावन जाता. सकाळीं स वांगडी आनी पुरयत मेळून देवीचे गर्भकुडींत घटस्थापना करतात. ते रातीक सावन महानवमी मेरेन सदांच देवीक महाअभिषेक सेवा आनी रातचो मखरोत्सव आसता. दरेके राती कडेन त्या त्या वांगड्यां प्रमाण यजमान आसतात. महानवमीक रातचो शिबिकोत्सव आनी उपरांत मखरोत्सव करून हाट उठयतात. उपरांत आशिर्वाद आनी प्रसाद आसता.
दशमी (दसरो) दिसा सांजेवेळार चार वरांचेर देवीची पालखी शिम हुपून देवीच्या पेडार दर्शना खातीर येता. थंय पुरयत अश्मांतक (आपट्याचे) पुजन करतात आनी उपरांत तांचें दिवप घेवप जाता. भावीक प्रसाद म्हणून भक्तीभावान हीं पानां घरा व्हरतात. भाविकांक दर्शन दिवन श्री देवळांत येता. उपरांत आरती, प्रसाद, भौशीक प्रार्थना करून ह्या पुराय उत्सवाची सांगता जाता. भाविकांची व्हड गर्दी आसता, अशी म्हायती पुरयत अनंत पाध्ये हांणी दिली. श्री शांतादुर्गा फातर्पेकरीण देवस्थानाचे अध्यक्ष देवाप्पा उर्फ देवेंद्र नायक देसाय, सचीव अजय देसाय, भांडारी सत्येंद्र नायक देसाय, ऍटर्नी संजय नायक देसाय नवरात्रोत्सव, दसरोत्सव येसस्वी करपाक यत्न करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
