भांगरभूंय | प्रतिनिधी
वाळपय: नगरगांव मुरमुणेंच्या खुशाली च्यारी हांच्या घरार आंब्याचें झाड पडून सुमार दोन लाख रुपयांचें लुकसाण जाल्ल्याचो अदमास आसा. ह्या कुटुंबाचेर बेघर जावपाची पाळी आयल्या. सरकारान तांकां अर्थीक मजत करची अशी मागणी थळाव्या नागरिकांनी केल्या.
मजगतीं, ह्या कुटुंबाक अर्थीक मजत करून घराचे पुराय दुरुस्तीचें काम बेगोबेग हातांत घेतले अशें मंत्री विश्वजीत राणे हांणी स्पश्ट केलां.
ही घडणूक मंगळारा रातीं घडली. हे विशीं नागरिकां कडल्यान मेळिल्ले म्हायती प्रमाण, खुशाली चारी हांच्या घरा शेजरा आशिल्लें आंब्याचें झाड अचकीत घराचेर पडलें. हाका लागून तांच्या घराच्या पांख्याचें बरेंच लुकसाण जालें. पांख्याचो भाग घरांत कोसळिल्ल्यान घरांतल्या वस्तुंचें लुकसाण जालें. टीव्ही, फ्रिज गॅस आनी हेर सामानाचें लुकसाण जालें.
हे विशीं वाळपय उजो पालोवपी दळाक म्हायती दिले उपरांत ते रोखडेच घडणुके सुवातेर पावले. मंगळारां रातीं उसरां मेरेन घरावेलें झाड काडपाचें काम सुरू आशिल्लें. तें मंगळारा पुराय जावंक नाशिल्ल्यान बुधवारा परत तें घरावेल्यान काडपाचें काम हातांत घेतलें. बुधवारा दनपार मेरेन घरावेलें पुराय झाड काडलें. खुशाली च्यारी हांणी सांगलें, घराच्या 90 टक्के भागाचें लुकसाण जालां. ह्या घरांत सध्या रावप धोक्याचें आसा. आपल्या कुटुंबाचेर संकश्ट कोसळिल्ल्याचें तांणी सांगलें.
उजो पालोवपी दळाचे अधिकारी संतोष गांवस हांणी, ह्या घरांचें सुमार दोन लाखांचें लुकसाण जालां. सध्या ह्या घरावेलें झाड काडलां. उरिल्ल्या घराक कांय धोको ना. मात ह्या घरांत सध्या रावप धोक्याचें आसा. हे विशींच अहवाल संबंदीत खात्याक धाडिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
