भांगरभूंय | प्रतिनिधी
वाळपय: वाळपय नगरपालिकेच्या मंडळाची मजत सुमार एक वर्सान पुराय जातली. मात नगरपालिकेच्या दुकानांची उरिल्ली वसुली आजूनय जावंक ना. वाळपय पालिका मंडळ हे खातीर पुरायेन अपेशी थारलां. लाखांनी रुपयांची थकबाकी वसूल जावंक ना. हाका लागून नगरपालिकेची तिजोरी खाली जाल्या. नगरपालिका मंडळांनी हाचे कडेन जरी विशेश लक्ष दिलां तरी लाखांनी रुपयांची थकबाकी वसूल जावन तिजोरेंत निधी एकठांय जावपाचो. मात हाचे कडेन विशेश लक्ष दिवंक ना. नगरपालिकेच्या मुख्याधिकार्यांनीय हाचे कडेन विशेश लक्ष दिवंक नाशिल्ल्याचो नागरिकांचो दावो आसा.
हे विशींची म्हायती अशी, फाटल्या नगरपालिका मंडळान वाळपय नगरपालिकेचे इमारतींत आशिल्ल्या दुकानांची पावणी केल्ली. खुबश्या जाणांनी दुकानां भाड्या घेतिल्लीं. मात दुकानांचो आराखडो वेवस्थीत नाशिल्ल्यान गिरायकांक तीं आवडूंक नात. हाका लागून खुबश्या जाणांनी हीं दुकानां परत केलीं. मात तीं परत करतना दुकानांची भाड्याची उरिल्ली रक्कम भरूंक ना. लागींलागीं पांच वर्सां परस चड काळ ही थकबाकी वसूल जावंक ना. सुमार ५० लाखांच्या लागींलागीं थकबाकी वसूल जावंक ना. हाका लागून नगरपालिकेचो लाखांनी रुपयांचो महसूल सध्या तरी बुडिल्ल्या मदीं जमा आसा. ह्या दुकानांची थकबाकी वसूल जाल्ली जाल्यार ते नगरपालिकेक अर्थीक नदरेन मजत जावपाची. हीं दुकानां चलयतना विजेचीं बिलां, उदकाचीं बिलां हाचे वांगडा दुकानांचें भाडें नगरपालिकेन वसूल करूंक ना. हाचे कडेन विशेश लक्ष दिवंक ना. पुरायेन आडनदर केल्या.
म्हत्वाचें म्हळ्यार खुबशीं दुकानां आजूनय बंद अवस्थेंत आसात. ह्या दुकानांची पावणी जावपाची गरज आशिल्ली. मात ही पावणी जावंक ना. हाचे कडेन नगरपालिकेच्या मंडळांनी विशेश लक्ष दिवंक ना. महसूल वाडीचे नदरेन बंद अवस्थेंत आशिल्लीं दुकानां भाड्याक दिल्लीं जाल्यार नगरपालिकेक हातुंतल्यान बरो महसूल मेळपाचो. मात हाचे कडेन विशेश लक्ष दिवंक़ नाशिल्ल्यान नगरपालिकेच्या महसुलांत व्हड प्रमाणांत फटको बसला.
वसुलीकडेन विशेश लक्ष दियात
मजगतीं, नगरपालिकेन वसुलीकडेन विशेश लक्ष दिवपाची गरज आसा. नगरपालिकेक दर म्हयन्याक कामगारांचो पगार दितना बरोच विचार करचो पडटा. दुकानांचें वेवस्थीत भाडें मेळिल्लें जाल्यार नगरपालिकेक कामगारांचो पगार दिवपाक कसलेच तरेच्यो उटाबशी काडच्यो पडच्यो नासल्यो. मात नगरपालिका मंडळ हाचे कडेन विशेश लक्ष दिनाशिल्ल्याचें समजता. नगरपालिकेच्या मुख्याधिकारी पदाचो ताबो सांबाळपी तेन्नो अधिकारी दशरथ गांवस हांणी हे खातीर विशेश मोहीम हातांत घेतिल्ली. दरेकल्याचेर कारवाय करपाचे नदरेन नोटीस धाडिल्ली. कांय थकबाकीदारांचेर कारवाय केल्ली. हाका लागून नगरपालिकेच्या थकबाकी वसुली मोहिमेक गती मेळिल्ली. मात तांची बदली जाले उपरांत हाचे कडेन पुरायेन आडनदर केल्या. म्हूण नगरपालिकेक अर्थीक नदरेन हाचो व्हडा प्रमाणांत फटको बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
