आयच्यान जाले पांच बदल
भांगरभूंय | प्रतिनिधी
आयज 1 ऑक्टोबराक पांच व्हड बदल जाल्यात. तातूंत सामान्य आरक्षण तिकीट ऑनलायन बुकींग करपा खातीर आधार सत्यापन सक्तीचें करप आनी एनपीएस नेमांत बदल हांचो आसपाव आसा. ते भायर पेट्रोलियम कंपनींनी 19 किलां वेपारी गॅस सिलिंडराचो दर 16.50 रुपया वाडोवन दिल्लींत तो 1,595.50 रुपयां मेरेन पावला.
- सामान्य आरक्षणा खातीर आधार गरजेचें
सामान्य आरक्षण तिकीट ऑनलायन बुकींग करपा खातीर आधार सत्यापन करचें पडटलें. हाका लागून सामान्य आरक्षण सुरू जाले उपरांत पयल्या 15 मिनटांनी आयआरसीटीसीचे वेबसायटीवेल्यान वा ऍपा वयल्यान तिकीट बुक करची पडटली. 15 मिनटां उपरांत आधार सत्यापना बगर तिकेट बूक करूं येता. हो नवो बदल सामान्य प्रवाशांच्या हितांत केला. हाका लागून तिकेटांचें ब्लॅक मार्केटींग जावचें ना.
- तुमकां यूपीआय वरवीं पयशांची मागणी धाडपाक मेळची ना
नॅशनल पेमेंट्स कॉर्पोरेशन ऑफ इंडिया (NPCI) न 1 ऑक्टोबर 2025 सावन UPI त पीअर- टू- पीअर (P2P) कलॅक्ट रिक्वेस्ट पुरायेन बंद करपाचे निर्देश दिल्यात. हाचो अर्थ असो, कोणेंच UPI वरवीं पयशे मागपी दुसर्या मनशाक रिक्वेस्ट धाडपाक शकचे ना.
हे निर्बंध फकत P2P कलेक्ट रिक्वेस्टचेर लागू जातात. वेपारी (जशें फ्लिपकार्ट, अमेझॉन, स्विगी वा आयआरसीटीसी) आजूनय पेमेंट प्रक्रिया करपा खातीर कलॅक्ट रिक्वेस्ट वापरपाक शकतले.
ह्या फिचराचो वापर करून खुबशे लोक UPI वापरकर्त्यांक फटींगपणां करताले. ते अनपेक्षीत मागण्यो धाडटाले आनी लोकांक पयशे ट्रान्सफर करपाक फसयताले. हें आडावपा खातीर NPCIन हो निर्णय घेतला.
- वेवसायीक गॅस सिलेंडर 16.50 रुपयांनी म्हारग जालो
आयच्यान 19 किलांचो वेवसायीक गॅस सिलिंडर 16.50 रुपयांनी म्हारग जाला. दिल्लीक ताची किंमत 15.50 रुपयांनी वाडून 1595.50 रुपयांचेर पावल्या. आदीं तो 1580 रुपयांक मेळटालो. कोलकातांत आता तो 1700.50 रुपयांक उपलब्ध जातलो, म्हणल्यार सिलेंडर 16.50 रुपयांनी वाडला.
- स्पीड पोस्ट सेवा जाली म्हारग
आयच्यान स्पीड पोस्ट सेवा आनीक म्हारग जाल्या. इंडिया पोस्टान वेगवेगळ्या श्रेणीं खातीर नवे शुल्क लागू केल्यात. सुरक्षा आनी सुविधायां मदींय सुदारणा केल्यात. ओटीपी कन्फर्म जाले उपरांतूच वस्तूंची डिलिव्हरी करतले.
ओटीपी आदारीत डिलिव्हरी खातीर, दरेका वस्तू खातीर रुपया 5 चड आनी + जीएसटी भरचो पडटलो.
रिअल-टायम डिलिव्हरीची स्थिती एसएमएस वरवीं उपलब्ध आसतली.
विद्यार्थ्यांक 10% सूट मेळटली आनी व्हडा प्रमाणांत गिरायकांक 5% सूट मेळटली.
- तुमी पुराय एनपीएस निधीची शेअर बाजारांत गुंतवणूक करपाक शकतात
बिगर-सरकारी एनपीएस वांगडी आतां तांचो पुराय निधी शेअर बाजारांत गुंतवणूक करपाक शकता. आदीं एनपीएसांत इक्विटी गुंतवणूक मर्यादा 75% आशिल्ली.
हाचो फायदो अशा लोकांक जातलो जे चड परताव्या खातीर शेअर बाजारांत रिस्क घेवपाक तयार आसात. हाका लागून गुंतवणूकदारांक निवृत्त जायसर व्हड निधी उबारपाक मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
