भांगरभूंय | प्रतिनिधी
केपें: कुकळ्ळी मतदारसंघांतल्या पारोडा पंचायतीचेर भाजपान आपलें वर्चस्व परत स्थापन केलें. राजश्री संदीप गांवकार हांची सरपंच पदार आनी उप सरपंच पदार नातालिनो वासुस्कर हांणी निवड जाली.
पारोडा पंचायतींत वट्ट ७ पंच वांगडी आसा. ही पंचायत बायलां खातीर राखीव आसा. हाका लागून हे पंचायतीचेर मनिषा नायक ही भाजपाच्या सरपंचपदा आशिल्ली. मात कांय म्हयन्यांनी तांकां सकयल काडून कॉंग्रेसीन ही पंचायत आपल्या कडेन वळयल्ली. मात भाजपाचे आदले आमदार क्लोफास डायस हांच्या यत्नांक लागून ही पंचायत परत आपल्या कडेन वळयल्या.
फाटल्या सरपंच आनी उप सरपंच पदार अविस्वास हाडले उपरांत दोनूय वटेन अर्ज आयिल्ले. ते खातीर मतदानूय जालें. हातूंत कॉंग्रेस गटांत 3 आनी भाजप समर्थक गटांत 4 अशें मतदान जालें. भाजपा वतीन सरपंचपदार राजश्री संदीप गांवकार, जाल्यार उप सरपंच पदार नातालिनो वासुस्कर हांणी जैत मेळयलें. हांकां भाजपचे मनिषा नायक आनी दीपक खरंगटे ह्या पंच वांगड्यांनी फाटबळ दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
